Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 236 Hüküm no: 263 Orijinal metin no: [68a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hindî Tekkesi’nde kalan fukaradan varisi olmadan vefat edenlerin terekelerinin tekke şeyhi tarafından zapt edilmesi Akzâ kuzâti’l-Müslimîn evlâ vülâti’l-muvahhidîn ma‘denü’l-fazl ve’l-yakīn râfi‘u a‘lâmi’ş-şerî‘ati ve’d-dîn vârisü ulûmi’l-enbiyâ-i ve’l-mürselîn el-muhtassu bi-mezîdi inâyeti’l-meliki’l-mu‘în Mevlânâ Üsküdar kādısı -zîdet fezâiluhû- tevkī‘-i refî‘-i hümâyûn vâsıl olucak ma‘lûm ola ki Üsküdar’da Solak Sinan mahallesinde Şeyh Seyyid Feyzullah Hindî binâ eylediği tekyenin fukarâsı ordu-yı hümâyûnuma arzuhâl edip tekye-i mezbûreye cihet-i erba‘adan birr ü siyâdet ile gelip onda [ikāmet] eyleyen fukarâ-i Hindiye’den bi-emrillâhi te‘âlâ bilâ-vâris fevt olanların muhallefâtına beytülmâl tarafından mutâlebe ve mu‘âraza olunmayıp tekyenin dâhil ve hâricinde vefât eden Hindî fukarâsının metrûkâtını ve muhallefâtını tekye-i mezbûrede şeyh bulunanlar ahz u kabz eyleyip beytülmâlciler tarafından ve sâirlerden ta‘allül ve müdâhale ve mu‘âraza olunmamak bâbında emr-i âlî-şân i‘tâ olunmak için fukarâ-i merkūme istid‘â-yı inâyet ve tekye-i merkūmenin meşîhati hâlâ Şeyh Turâbî -zîde salâhuhû- üzerinde olduğu bu def‘a? Evkāf Muhâsebesi’nden derkenâr olunmağla imdi vech-i meşrûh üzere merhameten ancak fukarâ-i Hindiye’nin bilâ-vâris-i ma‘rûf fevt olanların muhallefâtı şeyh-i mûmâ-ileyh tarafından zabt olunup beytülmâl emînleri taraflarından vaz‘-ı yed olunmamak bâbında fermân-ı âlî-şânım sâdır olmuşdur buyurdum ki hükm-i şerîfimle vardıkda bu bâbda sâdır olan emrim üzere amel edip dahi vech-i meşrûh üzere merhameten ancak fukarâ-i Hindiye’nin bilâ-vâris-i ma‘rûf fevt olanların muhallefâtını şeyh-i mûmâ-ileyh taraflarına zabt <> ettirdip beytülmâl emînleri taraflarından vaz‘-ı yed ile <> fukarâyı rencîde ve te‘addî ettirmeyesin şöyle bilesin alâmet-i şerîfe i‘timâd kılasın. Tahrîren fi’l-yevmi’s-sânî aşer şehr-i Saferi’l-hayr li-seneti ihdâ ve hamsîn ve mi’ete ve elf.