Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 245 Hüküm no: 273 Orijinal metin no: [72a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife Hatun’un yanında olan küçük oğlu Ahmed’e nafaka takdir edildiği Medîne-i Üsküdar’da Toygar Hamza mahallesi sâkinelerinden olup zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Hanife bt. Abdullah nâm hatun meclis-i şer‘-i şerîf-i enverde bast-ı kelâm ve ifâde-i merâm edip hâlâ hacr [u] terbiyemde olan sagīr Ahmed b. el-Hâc Mehmed’in nafaka ve kisve-bahâya eşedd-i ihtiyâcı olup ve mâlı dahi olmamağla babası gāib-i mezbûr el-Hâc Mehmed üzerine kadr-ı ma‘rûf nafaka takdîr olunmak murâdımdır dedikde <> fi’l-vâki‘ hâl mukırre-i mezbûrenin bâlâda bast [u] beyân ve tafsîl [u] ayân eylediği [idiği] minvâl-i muharrer üzere olmağla mezbûre Hanife’nin talebiyle külle yevm sagīr-i mezbûr için babası gāib-i mezbûr üzerine on beşer para nafaka farz ve takdîr edip meblağ-ı mefrûz-ı merkūmu sagīr-i mezbûra infâk ve iksâya ve lede’l-hace istidâneye ve vakt-i zaferde babası gāib el-Hâc Mehmed üzerine rücû‘a mukırre-i mezbûreye izin verilmeğin mâ-vaka‘a bi’t-taleb ketb olundu. Fi’l-yevmi’l-evveli min-Saferi’l-hayr li-seneti ihdâ ve hamsîn ve mi’ete ve elf. Şuhûdü’l-hâl: es-Seyyid Süleyman b. Ömer, Hasan Ağa b. Hüseyin, Mehmed b. Receb.