Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 245 Hüküm no: 274 Orijinal metin no: [72b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Mehmed’in daha önce tahrir edilen terekesinin yenilenmesi Musahhah. Müteveffâ-yı mezbûrun vârislerine bu makūle te‘addî olunduğu vâki‘ ise mukaddemâ sâdır olan emr-i âlî mûcebince mübâşir ta‘yîn olunan ma‘rifeti ve Üsküdar kādısı fazîletlü efendi ma‘rifetiyle müceddeden tahrîr olunup sülüsü ifrâz ve vücûh-ı birre sarf olunmak üzere mevkūfen teslîm-i Hazîne-i âmire olundukdan sonra nâib-i mezbûrun aldığı resm-i kısmet geri vârislerine red olunmak buyruldu. Ma‘rûz-ı dâ‘î-i devletleridir ki Tuzla karyesinde fevt olan Mehmed’in terekesi mukaddemâ Kartal nâibi ma‘rifetiyle tahrîr olunup sülüsü ifrâz olunmamağla veresesi meclis-i şer‘a gelip müteveffâ-yı merkūmun eşyâsı ketm ü ihfâ olunmuşdur müceddeden tahrîr ve sülüsü ifrâz olmağa cümle verese râzı olmalarıyla ta‘yîn buyrulan Abdurrahim Çavuş kulları mübâşeretiyle müteveffâ-yı merkūmun terekesi ma‘rifet-i şer‘le tahrîr ve sülüsü ifrâz olunmak bâbında müteveffâ-yı merkūmun veresesi fermân-ı âlî recâ ettikleri huzûr-ı âlîlerine i‘lâm olundu fermân men-lehü’l-emrindir. Fî 24 min-Ramazani’l-mübârek sene 1150 El-abdü’d-dâ‘î li’d-devleti’l-aliyye el-Hâc Mehmed en-Nâibü bi-medîneti Üsküdar