Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 246 Hüküm no: 275 Orijinal metin no: [72b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Mehmed’in terekesinin yeniden tahririn yapıldığı Ma‘rûz-ı dâ‘î-i devletleridir ki Müteveffâ-yı mezbûrun terekesi bu dâ‘îlerine hitâben sâdır olan fermân-ı âlîleri üzere Abdurrahim Çavuş kulları mübâşereti ve Tuzla karyesi ve civârında vâki‘ kurâ ahâlîsi ve imâm ve zâbiti ma‘rifeti ile müceddeden tahrîr için taraf-ı şer‘den irsâl olunan Kâtib Ahmed Efendi dâ‘îleri müteveffâ-yı mezbûrun hayâtında sâkin olduğu menzile varıp akd-i meclis-i şer‘-i âlî ettikde müteveffâ-yı mezbûrun mecmû‘-ı terekesini tahrîr ve defter ettikde seksen bin sekiz yüz yetmiş dört akçe terekesi kıymeti olmağla evvelâ mecmû‘-ı terekeden techîz ve tekfîn ve iskāt-ı salât için ber-mûceb-i vasiyet altı bin akçe ve şuhûd-ı udûlle sâbit olan dört bin akçe deyni ve üç ay mukaddem fevt olmağla terekeden sülüsü tahsîl için ta‘yîn olunan mübâşirlerin ücret-i kayık ve ta‘âmiye masrafı iki bin dört yüz akçe ki cem‘an on iki bin dört yüz akçe ber-vech-i muharrer terekeden ba‘de’l-ihrâc bâkī kalan altmış sekiz bin dört yüz yetmiş dört akçenin sülüsü olan yirmi iki bin sekiz yüz yirmi üç akçe ihrâc ve teslîm-i Hazîne-i âmire için mübâşir-i merkūm Abdurrahim Çavuş kullarına teslîm ve bâkī kalan terekesini veresesi beyninde bi’l-farîzati’ş-şer‘iyye tevzî‘ ve taksîm edip ba‘dehû ümenâ-i şer‘le gelip alâ-vukū‘ihi inhâ eylediği ber-mûceb-i fermân-ı âlî huzûr-ı âlîlerine i‘lâm olundu bâkī fermân men-lehü’l-emrindir. Fî 9 min-Şevvâli’l-mükerrem sene 1150