Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 338 Hüküm no: 336 Orijinal metin no: [75b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Londari v. Nikola’nın evini Yakub Beşe b. Mustafa’ya istiğlal yoluyla sattığı Mahmiye-i İstanbul’da Alipaşa-yı atîk Mahallesi’nde mütemekkin Ondari [Londari] v. Nikola nâm zimmî meclis-i şer‘-i hatîr-i lâzımü’t-tevkīrde Dergâh-ı âlî yeniçeri odalarından seksen yedi cemâ‘ati odası neferâtının nukūd-ı mevkūfelerine bi’l-fi‘il mütevellî olan işbu bâ‘isetü’l-vesîka Ya‘kub Beşe b. Mustafa muvâcehesinde ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezkûrede vâki‘ bir tarafdan Papa Karalı mülkü ve bir tarafdan Görücü? Nikola mülkü ve bir tarafdan Bakkāl Mihail mülkü ve bir tarafdan tarîk-i âm ile mahdûd tabaka-i ulyâda bir bâb oda ve vustâda bir bâb oda ve tahtında bir bâb mahzen ve havluyu müştemil mülk menzilimi cemî‘ tevâbi‘ ve levâhıkı ile mütevellî-i mezbûr Ya‘kub Beşe’ye iki yüz guruşa bi-tarîkı’l-istiğlâl bey‘ ve teslîm ol dahi ber-vech-i muharrer iştirâ ve tesellüm ve kabz ve kabûl eylediğinden sonra semeni olan meblağ-ı mezkûr iki yüz guruşu mütevellî-i mezbûr yedinden tamamen ahz u kabz edip menzil-i mahdûd-ı mezkûru ba‘de’t-tahliyyeti’ş-şer‘iyye ve’t-takābuzi’l-mer‘î târih-i vesîkadan her sene otuz guruşdan iki sene tamamına değin altmış guruşa bana îcâr ve teslîm ben dahi meclis-i şer‘de ber-vech-i muharrer istîcâr ve kabûl eyledim dedikde gıbbe’t-tasdîkı’ş-şer‘î mesfûr Londari zimmî meclis-i şer‘de Abdullah Odabaşı mahzarında ikrâr ve takrîr-i kelâm edip ve bey‘-i mezbûr hakīkatda rehin ve meblağ-ı mezbûr zimmetinde deyn olmağla müddet-i mezkûre tamamında deyn-i mezkûr iki yüz guruş ile ücret-i mezkûre altmış guruşu edâ edemezsem menzil-i mahdûd-ı mezkûr semen-i misli ile âhara bey‘ ve kabz-ı semen ve semeninden deyn-i merkūm ile ücret-i mezkûreyi mütevellî-i mezbûr Ya‘kub Beşe’ye edâya ve fazla kalırsa bana îsâle azl ve in‘izâlden masûne akd-i rehinde meşrûta vekâlet-i [de]vriyye ile tarafımdan mezbûr Abdullah Odabaşı vekîl ve nâib-i menâb nasb ve ta‘yîn eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-Recebi’l-ferd li-sene selâse ve erba‘în ve mi’e ve elf. Şuhûdü’l-hâl: Osman Odabaşı b. Abdullah, el-Hâcı Mehmed b. Mustafa, Ali Çelebi b. İbrahim, Mustafa Çelebi b. ( ), Âşık Halil b. ( ), Osman Çelebi b. ( ), İbrahim b. Mustafa ve gayruhum.