Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 339 Hüküm no: 337 Orijinal metin no: [75b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice Hatun bt. Abdullah ile oğlu Ahmed Efendi’nin evlerini Haraççı Muhyiddin Vakfı’na sattıkları Nukūd akār tebdîl. Mahmiye-i İstanbul’da Sekbanbaşı İbrahimağa Mahallesi’nde sâkin iken bundan akdem vefât eden Mehmed Efendi b. Ahmed b. Hüseyin Efendi’nin verâseti zevce-i menkûha-i metrûkesi Hadice Hatun bt. Abdullah ile sulbî kebîr oğlu Ahmed Efendi’ye münhasıra olmağla zâtı eş-Şeyh Efendi b. Mehmed ve Hâfız Mehmedî b. Mustafa nâm kimesneler ta‘rîfleriyle mu‘arrefe olan mezbûre Hadice Hatun ile merkūm Ahmed Efendi meclis-i şer‘-i şerîf-i enverde mahmiye-i mezbûrede Harâc[cı] Muhyiddin Vakfı’nın nukūd-ı mevkūfesine bi’l-fi‘il mütevellî olan bâ‘isü hâzihi’l-vesîka Abdullah Ağa b. Halil mahzarında her biri ikrâr-ı tâm ve takrîr-i kelâm edip mütevellî-i mezbûr Abdullah Ağa yedinde olan nukūd-ı mevkūfeyi akāra tebdîle ber-mûceb-i hüccet-i şer‘iyye kıbel-i şer‘den me’zûn olmağın hâlâ bi’l-irsi’ş-şer‘î yedimizde mülk ve hakkımız olup mahalle-i mezbûrede vâki‘ bir tarafdan Bezzâzistânî İmâm İshak Efendi mülkü ve bir tarafdan Başhalîfe Hasan Efendi veresesi mülkleri ve bir tarafdan mezbûr eş-Şeyh Ahmed zevcesi mülkleri ve bir tarafdan tarîk-i hâs ile mahdûd fevkānî üç oda ve iki sofa ve tahtânî iki oda ve bir sofa ve bi’r-i mâ ve havluyu muhtevî birbirine muttasıl iki bâb menzilimizi cümle tevâbi‘ ve levâhıkı ile vakf-ı mezbûre akār için beş yüz guruşa mütevellî-i mezbûra bey‘ ve temlîk ve teslîm eylediğimizde ol dahi minvâl-ı meşrûh üzere ba‘de’l-iştirâ ve tesellüm ve kabûl semeni olan meblağ-ı mezbûru nukūd-ı mevkūfeden olmak üzere mütevellî-i mezbûr bize def‘ ve teslîm [76a] biz dahi ber-vech-i muharrer bi-kadri’l-hısas tamamen ahz u kabz eyledik. Fîmâ[-ba‘d] menzil-i mahdûd-ı mezkûr vakf-ı mezbûr alıp kat‘â bizim alâka ve medhalimiz kalmamışdır dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâmin ve’l-ışrîn min-Recebi’l-ferd li-sene selâse ve erba‘în ve mi’e ve elf. Şuhûdü’l-hâl: İbrahim Efendi b. el-Hâc Mustafa, Sarrac Mehmed Çelebi, Mehmed Efendi b. ( ) el-imâm, Molla Mustafa müezzin, Şeyh Ahmed Efendi b. Mehmed, Hâfız Mehmed Efendi b. Mustafa, Halil Çelebi b. Hasan, Berber Mehmed Çelebi b. Osman, Berber Molla Mustafa b. Mehmed, Mehmed Emin b. Abdullah, el-Hâc Ali b. İbrahim, Abdullah Halîfe b. Halil, Derviş İbrahim b. Osman, Peştamalcılar kethüdâsı Molla Mustafa ve gayruhum.