Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 52 Hüküm no: 4 Orijinal metin no: [2a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed’den boşanan Ayşe’nin küçük oğulları Ahmed’in bakımı konusunda eski kocası ile anlaşmaya vardıkları Ma‘rûz; Sâdır olan fermân-ı âlîlerine imtisâlen ta‘yîn buyrulan Kapıkethudâsı Halil Beşe kulları mübâşeretiyle akd olunan, sahibe-i arzuhâl Âişe sâbıkā zevci el-Hâc Mehmed ile dîvân-ı âlîlerinde ma‘kūd meclis-i şer‘de ba‘de’t-terâfu‘ Üsküdar’a havâle olundukdan sonra derûn-ı arzuhâlde mezkûr sulbî sagīr oğlu Ahmed’in hıdânesi şer‘an sâkıt olduğunu mezbûre Âişe mu‘terîfe olup lâkin sagīr-i mezbûr târih-i i‘lâmdan bu sene tamamına değin yine anası mezbûrenin yanında olup hamsîn günlerinde hocadan âzad oldukda babası yanına varıp Cumartesi gününe değin babası yanında sâir eyyâmda anası mezbûre yanında olmak üzere beynleri tevfîk olunup bu vechile her biri râzı ve mezbûre Âişe dahi yanında olmadığı eyyâmda sagīrin nafakası içün bir nesne taleb etmemek üzere meclis-i şer‘de ta‘ahhüd ve bu vechile kat‘-ı nizâ‘ etdikleri mübâşir kulları iltimâsıyla huzûr-ı âlîlerine i‘lâm olundu. Fî 7 Rebî‘ülâhir sene 1154