Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 340 Hüküm no: 338 Orijinal metin no: [76a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hanım Vakfı’na ait harabe evde yapılan keşif ve yeniden inşası için mutasarrıfı el-Hâc İbrahim’e izin verildiği Ahbartü bimâ-fîhi nemekahü’l-fakīr ileyhi te‘âlâ Yahya el-müvellâ hilâfeten bi-medîneti Kostantıniyye Gufira-leh. Husûs-ı âti’l-beyânın mahallinde keşf ve tahmîn ve takvîmi için sâdır olan fermân-ı âlîye imtisâlen kıbel-i şer‘den irsâl olunan Mevlânâ es-Seyyid Ahmed Efendi hâssa mi‘mârı halîfelerinden Ya‘kub Halîfe b. Abdullah ile medîne-i Hazret-i Eyyübü’l-Ensârî -aleyhi’r-rahmeti’l-Bârî- mahallâtından Kızılmescid Mahallesi’nde vâki‘ ashâb-ı hayrâtdan merhûme Emine Hanım Vakfı müsakkafâtından olup bir tarafdan merhûm Molla Çelebi Zâviyesi ve bir tarafdan bostan ve bir tarafdan ba‘zan yine bostan-ı mezbûr ve ba‘zan bakkal dükkânı ve bir tarafdan tarîk-i âm ile mahdûd menzile varıp zeyl-i sahîfede mektûbü’l-esâmî ebniye ve sukūf ahvâline ıttılâ‘ı olan bî-garaz Müslimîn mahzarlarında akd-i meclis-i şer‘-i şerîf ettikde menzil-i mezkûra icâreteyn-i ma‘lûmeteyn ile bundan akdem mutasarrıf olan işbu bâ‘isü’l-kitâb el-Hâc İbrahim b. Halil Bey nâm kimesne meclis-i ma‘kūd-ı mezkûrda vakf-ı mezbûra bi’l-fi‘il mütevellî olan Mesud Efendi b. Ali b. Abdullah tarafından husûs-ı âti’l-beyâna vekîl-i sâbitü’l-vekâlesi vakf-ı mezbûr kâtibi Ahmed Efendi mahzarında takrîr-i kelâm ve tâ‘bir ani’l-merâm edip menzil-i mahdûd-ı mezkûrun ebniye-i kadîmesi müşrif-i harâb olup bir vechile kābil-i süknâ olmayıp ve ta‘mîr ve meremmete cânib-i vakfda nesne olmamağla ba‘zı nıkzı keşif ve mu‘âyene ve tahmîn-i sahîh ile tahmîn ve takvîm olundukdan sonra mâlım ile müceddeden nefsim için binâya bi’t-tevliye bana izin verilmek matlûbumdur dedikde mi‘mâr-ı mezkûr ba‘de’l-mu‘âyene nıkz-ı mezkûrun kıymetini beş bin dört yüz akçeye bâliğ olduğunu ihbâr ve Müslimûn-ı mezkûrun icmâ‘ ve ittifâk ettiklerinden sonra vekîl-i mezbûr nıkz-ı mezkûru mezbûr el-Hâc İbrahim beş bin dört yüz akçeye bi’l-vekâle bey‘ ve temlîk ve teslîm eyledikde ol dahi ber-vech-i muharrer iştirâ ve temellük ve tesellüm ve kabz eyledikden sonra semen-i mezbûru vakıf için yedinden tamamen ahz u kabz edip ber-vech-i muharrer nefsi’çün kendi mâlıyla müceddeden binâya mezbûr el-Hâc İbrahim’e izin verildiğini mevlânâ-yı mezbûr mahallinde ketb ü tahrîr ve ma‘an ba‘s olunan Ahmed b. Mehmed ve Mustafa b. Ahmed ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min-Recebi’l-ferd sene 1143. Şuhûdü’l-hâl: Şeyh Osman Efendi b. Mehmed mürtezika-i vakf, Ahmed Efendi b. Osman mürtezika, Hâfız İbrahim Efendi mürtezika-i vakf, Hasan Efendi b. Ali câbî-i vakf, Hüseyin Ağa b. Süleyman, Ali Bey b. Abdurrahman, Bostanî Ahmed Bey b. Abdurrahman, Eskici Mehmed b. Ali, el-Hâc Mehmed b. Mehmed, Numan Çelebi b. Abdullah, Halil b. Mustafa.