Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 341 Hüküm no: 339 Orijinal metin no: [76a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe’nin vasiyeti ve ölümünden sonra terekesi için eşini vasi tayin ettiği Husûs-ı âti’l-beyânın mahallinde ketb ü tahrîri için bi’l-iltimâs savb-ı şer‘-i kavîmden irsâl olunan Mevlânâ es-Seyyid Feyzullah Efendi b. el-merhûm Abdülkerim Efendi mahmiye-i İstanbul’da Yenibahçe kurbünde Karabaş Mahallesi’nde hamal tâifesinden Mehmed Beşe b. Mustafa b. Abdurrahman’ın sâkin olduğu menzile varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i nebevî ettikde mezbûr Mehmed Beşe meclis-i ma‘kūd-ı mezkûrda zevce-i menkûhası bâ‘is[etü] hâzihi’l-vesîka İsmihan bt. Ahmed nâm hatun mahzarında ikrâr-ı tâm ve takrîr-i kelâm edip ben bi-emri’llâhi te‘âlâ vefât eylediğimde bi’l-cümle terekem ahz u kabz ve sünnet-i seniyye üzere techîz ve tekfîn ve levâzım ve defnim görüldükden sonra arpacı tâifesinden Mehmed Beşe nâm kimesneye arpa bahâsından dolayı deynim olan kırk guruş ve yine arpacı tâifesinden Koca Hüseyin nâm kimesneye kezâlik arpa bahâsından beş guruş Na‘[l]band Hendekli Süleyman nâm kimesneye na‘l ve mıh semeninden beş guruş on altı para ve zevcem mezbûre İsmihan Hatun’a cihet-i karz-ı şer‘îden zimmetimde deynim olan üç yüz guruş ki cem‘an üç yüz elli guruş on altı para deynim ba‘de’l-edâ bâkī kalan terekemin sülüsü ifrâz ve sülüs-i mezbûrdan üç yüz bir akçe ıskāt-ı salâtım için vech-i şer‘î üzere fukarâya devroluna ve zevcem mezbûreden gayrı [76b] kat‘â vâris ve veresem olmamağla mâ‘adâ terekemin rub‘unu bi’l-verâse ahz u kabz eylediğinden sonra selâse-i erba‘ını dahi zevcem mezbûreye vasiyyet eyledim her ne hâsıl olur ise zevcem mezbûre bi’l-vesâye ahz u kabz edip dilediği umûruna harc ve sarf ede deyü vasiyyet ve tenfîzine zevcem mezbûre İsmihan Hatun’u vasiyy-i muhtâr nasb ve ta‘yîn eyledim dedikde ol dahi vesâyet-i mezbûreyi kabûl ve hizmet-i lâzımesin kemâ-yenbagī edâya ta‘ahhüd ve iltizâm eylediğini mevlânâ-yı mezbûr mahallinde ketb ü tahrîr ve ma‘an ba‘s olunan Çukadâr Abdürrahim b. Hüseyin ve Muhzır es-Seyyid Mustafa b. Hasan ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sâmin ve’l-ışrîn min-[Re]cebi’l-ferd li-sene selâse ve erba‘în ve mi’e ve elf. Şuhûdü’l-hâl: Mahalle-i mezbûr müezzini es-Seyyid Mehmed Efendi, es-Seyyid Hüseyin Çelebi b. es-Seyyid Mehmed, es-Seyyid Ömer Çelebi b. Şa‘ban, es-Seyyid Yusuf Çelebi b. Osman, Mehmed Çelebi b. İsmail, Abdullah Beşe b. Ahmed, Mustafa Beşe b. Hasan, Mustafa Odabaşı b. Musa, Molla Hüseyin b. Ahmed, İbrahim Beşe b. Hüseyin, Mustafa Beşe b. Mehmed, diğer Mustafa Beşe b. Osman, Çukadâr Abdürrahim b. Hüseyin.