Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 342 Hüküm no: 340 Orijinal metin no: [76b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Abdullah’ın azatlı cariyesi Emetullah ve kocası Mahmud Beşe haklarındaki eşya davasını delillendiremediği Mahmiye-i İstanbul’da Akşemseddin Mahallesi sâkinelerinden Fâtıma bt. Abdullah nâm hatun mahfil-i kazâda bâ‘isetü hâzihi’l-vesîka Emetullah bt. Abdullah ile zevci Mahmud Beşe b. Ömer mahzarlarında üzerlerine da‘vâ ve takrîr-i kelâm edip mezbûre Emetullah yedimde câriye-i memlûkem iken târih-i kitâbdan beş ay mukaddem zevci mezbûr Mahmud ile ma‘an on beş zincirli ve sekiz Macar altını ve beşlik Macar altını ve on iki eşrefî altınım ile mecmû‘u iki yüz guruş kıymetli yirmi miskāl bir çift altın bilezik ve bir sim sa‘at ve üç pafta bir sim kuşak ve bir çift incili küpeden başım yanından ve bir sim bâzûbend ve iki altın yüzük ve iki miskāl ve iki havlu makreme ve bir çuka biniş ve yirmi iki sahan ve iki tencere ma‘a kapak ve bir fener ve iki hoşâb tası ve bir ayak ve bir tebsi ve bir seccâde ve üç beledî yastık ve üç çakşır ve sarık ve bir kebîr Yanbolu kebesi ve bir kebîr bakracımız hufyeten ve bi-gayr-ı hakkın ahz u kabz etmeleriyle hâlâ mezbûrâna suâl olunup câriye-i mezkûrem nefsini bana ba‘de’t-teslîm zikrolunan nukūd mevcûde ise ayânı, müstehleke ise nukūd-ı mezkûrenin mislini ve eşyâ-i mezkûrenin ba‘de’s-sübût kıymet-i şer‘iyyelerini bana edâ ve teslîme mezbûreye tenbîh olunması matlûbumdur dedikde gıbbe’s-suâl mezbûrân cevâblarında eşyâ-i mezkûreyi her biri bi’l-külliye inkâr ettiklerinden gayrı mezbûre Emetullah fi’l-vâki‘ müdde‘iyye-i mezbûre Fâtıma Hatun ber-vech-i muharrer târih-i kitâbdan beş ay mukaddem yedinde mülk ve hakkı olduğu hâlde beni mâlından tahrîr ve i‘tâk ve sâir harâir-i asliyyât zümresine ilhâk etmişdir deyü def‘ edicek gıbbe’l-istintak ve’l-inkâr tarafeynden beyyine lâzım gelmeğin evvelâ mezbûre Emetullah’dan def‘-i meşrûhuna beyyine taleb olundukda udûl-i ahrâr-ı ricâl-i Müslimînden mahalle-i mezbûre imâmı Şeyh Mustafa Efendi b. Mehmed ve ahâlîsinden İsmail Çelebi b. Hüseyin ve Ahmed Çelebi b. Mehmed ve Veliyüddin Çelebi b. Halil nâm kimesneler li-ecli’ş-şehâde meclis-i şer‘a hâzirûn olup isre’l-istişhâd fi’l-hakīka işbu müdde‘iyye-i mezbûre Fâtıma Hatun târih-i kitâbdan beş ay mukaddem mezbûre Emetullah’ı yedinde mülk ve hakkı olduğu hâlde bizim huzûrumuzda mâlından tahrîr ve i‘tâk eylediğinden sonra mezbûr Mahmud Beşe’ye lede’ş-şuhûd akd ve tezvîc eyledi mezbûre Emetullah sâir harâir-i asliyyât gibi hürredir biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye ettikde gıbbe’t-ta‘dîl ve’t-tezkiye şehâdetleri makbûle olmağın mûcebince mezbûre Emetullah’ın ıtkına ba‘de’l-hükm sâniyen nukūd ve eşyâ da‘vâsını mübeyyine müdde‘iyye-i mezbûreden beyyine taleb olundukda ityân-ı beyyineden izhâr-ı aczile istihlâf etmeğin fi’l-hakīka müdde‘iyye-i mezbûrenin bâlâda mezkûr nukūd ve eşyâsını ber-vech-i muharrer ahz u kabz etmeyip üzerlerine red ve damândan nesne lâzım gelmediğine mezbûrân Emetullah ve Mahmud’dan takrî[ri]ne? yemîn teklîf olundukda onlar dahi yemîn bi’llâhi te‘âlâ etmeğin [77a] mezbûre Fâtıma Hatun bilâ-beyyine bî-vech mu‘ârazadan men‘-birle mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Recebi’l-ferd li-sene selâse ve erba‘în ve mi’e ve elf. Şuhûdü’l-hâl: Mehmed Çelebi b. Abdullah, Ahmed Çelebi b. el-Hâc Mehmed, Duhânî Mehmed b. Ahmed, Ali Çelebi b. Şeyh Mustafa Efendi, Ya‘kub b. Abdullah.