Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 70 Hüküm no: 45 Orijinal metin no: [8a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esirci Süleyman’ın Çukadar Mehmed Ağa’ya aid olan sansar kürkü iade etmesi Ma‘rûz; Tersâne-i âmire’de sâkin Çukadâr Mehmed Ağa hasmı Esirci Süleyman’ı meclis-i şer‘a ihzâr ve muvâcehesinde işbu meclis-i şer‘de mu‘âyene olunan canfese kaplı bu sansar paçası kürk benim mülküm olup târih-i i‘lâmdan yirmi gün mukaddem Tersâne-i âmire’de odamdan zâyi‘ olup mezbûrun yedinde bulmakla bi’l-istihkāk taleb ederim deyü ba‘de’d-da‘vâ ve’l-inkâr müdde‘î-i mezbûr müdde‘âsını lede’t-tezkiye adâletleri zâhir Mehmed b. Mustafa ve Osman b. Mustafa nâm kimesneler şehâdetleriyle vech-i şer‘î üzere isbât etmeğin ba‘de’t-tahlîfi’ş-şer‘î mûcebince zikrolunan kürkü müdde‘î-i mezbûra teslîme mezbûr Süleyman’a tenbîh olunduğu bi’l-iltimâs huzûr-ı âlîlerine i‘lâm olundu. Fî 8 Cumâdelûlâ sene 1154