Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 70 Hüküm no: 46 Orijinal metin no: [8a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa’nın kefaletten dolayı Fatma Hatun’a olan borcunu ödemesi Ma‘rûz; Üsküdar’da sâkine Fâtıma Hatun hasmı Mustafa ile mürâfa‘a-i şer‘ oldukda beher sene yetmiş ikişer para ücret ile mezbûr Mustafa’nın zevcesi gāibeti ani’l-meclis Âişe’nin mutasarrife olduğu menzil icâresinden bin yüz elli dört senesi şehr-i Rebî‘ülâhir gāyetine gelince dört sene ve altı aylık menzil icâresinden müctemi‘ sekiz guruş dört para hakkıma mezbûr Mustafa emr ü kabûlü hâviye kefâlet-i sahîha-i şer‘iyye ile kefîl ve dâmin olmağla kefâletine binâ’en taleb ederim deyü da‘vâ etdikde mezbûr Mustafa cevâbında sekiz guruş dört para icâreye kefîl ve dâmin olduğunu ikrâr lâkin meblağ-ı merkūmdan altı guruş bir rub‘unu müdde‘iye-i mezbûreye edâ ve teslîm eyledim deyü ba‘de’d-def‘ ve’l-inkâr mezbûr Mustafa def‘-i mezkûrunu isbâtdan izhâr-ı acz edip talebiyle müdde‘iye-i mezbûreye kefâletine binâ’en edâ ve teslîme mezbûr Mustafa’ya tenbîh olunduğu bi’l-iltimâs huzûr-ı âlîlerine i‘lâm olundu. Fî 8 Cumâdelûlâ sene [1]154