Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 345 Hüküm no: 342 Orijinal metin no: [77a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çelebi b. Mustafa’nın evini Havva bt. Mustafa’ya sattığı Mübâya‘a. Mahmiye-i İstanbul’da Karabaş Mahallesi ahâlîsinden İbrahim Çelebi b. Mustafa meclis-i şer‘-i şerîf-i enverde işbu bâ‘isetü’l-vesîka gāibetü ani’l-meclis Havvâ bt. Mustafa nâm hatun zevci ve tarafından husûs-ı âti’z-zikre vekîl olduğu zât-ı mezbûreyi ma‘rifet-i şer‘iyye ile ârifân mahalle-i mezbûre sâkinlerinden el-Hâc İbrahim b. Mustafa ve el-Hâc Mustafa b. Abdullah şehâdetleriyle sâbit olan Abdullah Çelebi b. Ali muvâcehesinde ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan Bostanî Mehmed Çelebi mülkü ve iki tarafdan Ömer Usta mülkü ve bir tarafdan tarîk-i âm ile mahdûd tahtânî iki bâb oda ve bir sofa ve kenîf ve eşcâr-ı müsmire ve gayr-ı müsmireli bahçeyi müştemil mülk menzilimi tarafeynden îcâb ve kabûlü hâvî ve şürût-ı ta‘deden [müfsideden] ârî bey‘-i bâtt-ı sahîh-i şer‘î ile müvekkile-i mezbûre Havvâ Hatun’a yüz otuz iki guruş semen-i makbûza bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra min-ba‘d menzil-i mahdûd-ı mezkûrda benim kat‘â alâka ve medhalim kalmayıp müvekkile-i mezbûre Havvâ Hatun’un mülk-i müşterâsı ve hakk-ı sırfı olmuşdur. Keyfemâ-teşâ ve tahtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis min-şehri Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: El-hâcı İbrahim b. Mustafa, Ali Çelebi b. Abdullah, Hasan Odabaşı b. Abdullah, İbrahim Odabaşı b. Abdullah ve Mustafa Odabaşı b. Abdullah, İsmail Odabaşı b. Ahmed, Süleyman Odabaşı b. Abdullah, el-Hâcı Hüseyin b. Ali.