Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 345 Hüküm no: 343 Orijinal metin no: [77b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Ahmed ile eşi el-Hacı Mehmed’in muhala‘a yoluyla boşandıkları Muhâla‘a. Mahmiye-i İstanbul’da Kızıltaş Mahallesi sâkinelerinden olup zâtı Yahya Efendi b. Abdülhalim [ve] el-Hâcı Mustafa Çelebi b. Mehmed nâm kimesneler ta‘rîfleriyle mu‘arrefe olan Âişe bt. Ahmed nâm hatun meclis-i şer‘-i şerîf-i enverde zevc-i dâhili işbu bâ‘isü’l-kitâb el-Hâcı Mehmed b. Mehmed mahzarında ikrâr-ı tâm ve takrîr-i kelâm edip mezbûr Mehmed zevcim olup beynimizde hüsn-i mu‘âşeretimiz olmamağla zimmetinde mukarrer ve ma‘kūdun-aleyh bin beş yüz akçe mehr-i müeccelimin ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr el-Hâcı Mehmed ile muhâla‘a-i sahîha-i şer‘iyye ile muhâla‘a eylediğimde ol dahi ber-vech-i muharrer hul‘-ı mezbûr[u] ba‘de’l-kabûl hukūk-ı zevciyyete müte‘allika da‘vâdan her birimiz âharın zimmetini ibrâ-i âmm-ı râfi‘-i hısâm ile ibrâ ve iskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâmis min-şehri Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Yahya Efendi b. Abdülhalim, el-Hâcı Mustafa Çelebi b. Mehmed, Memiş Ağa duhânî, Mehmed Çelebi duhânî, Kahv[e] kâtibi Çelebi?, Mehmed Çelebi b. Abdullah bölükbaşı, Kerpicî Abdullah Çelebi muhzır, Kādızâde İbrahim Çelebi du‘âcı.