Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 346 Hüküm no: 344 Orijinal metin no: [77b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın taş bedelinden dolayı Anastaş v. Serkis’e borçlu olduğunu kabul ettiği Mahmiye-i İstanbul’da taşçı tâifesinden râfi‘u’s-sifr Anaştaş v. Serkis nâm zimmî meclis-i şer‘-i şerîf-i enverde Soğancıbaşı demekle arîf Ahmed Ağa b. ( ) nâm kimesne mahzarında üzerine da‘vâ ve takrîr-i kelâm edip mezbûr Ahmed Ağa her çekisi altışar buçuk akçe olmak üzere yedimden on bir bin iki yüz seksen dört çeki taş iştirâ ve kabz etmekle semeninden müctemi‘ olan yetmiş üç bin üç yüz kırk altı akçeden bi’d-defa‘ât elli üç bin altı yüz kırk üç akçesin bana teslîm etmekle bâkī zimmetinde kalan o[n] dokuz bin yedi yüz altı akçeyi mezbûr Ahmed Ağa’dan taleb ederim suâl olunup edâsı ile tenbîh olunmak murâdımdır dedikde gıbbe’s-suâl mezbûr Ahmed Ağa cevâbında fi’l-vâki‘ hâli müdde‘î-i mesfûr Anaştaş zimmînin takrîr-i meşrûh[u] üzere olup elân yedinden iştirâ ve kabz eylediği ol mikdâr çeki taş semeninden zimmetinde on dokuz bin yedi yüz altı akçe deyni olduğunu ikrâr u i‘tirâf etmekle mûcebiyle ba‘de’l-hükm ve’t-tenbîh mâ-vaka‘a bi’t-taleb ketb olundu. Fi’l-yevmi’r-râbi‘ min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Fahrü’l-kuzât Musazâde Abdullah, Mehmed Çelebi kethüdâ-yı muhzırân, İbrahim b. Abdullah, el-Hâcı Halil b. İsmail.