Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 346 Hüküm no: 345 Orijinal metin no: [77b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacca gidecek olan Fâtıma bt. Osman vasiyeti ve terekesine Hafız Veliyüddin Efendi’yi vasi, Osman Beşe’yi nazır tayin ettiği < Gufira-leh. Mahmiye-i İstanbul’da Ayasofya-i kebîr kurbünde İshakpaşa Mahallesi sâkinelerinden olup zâtı mahalle-i mezbûre imâmı Ahmed Efendi b. Ali [ve] es-Seyyid Ahmed b. es-Seyyid Mehmed nâm kimesneler ta‘rîfleriyle mu‘arrefe olan Fâtıma bt. Osman b. Hasan nâm hatun meclis-i şer‘-i şerîf-i enverde ber-vech-i âtî vasiyy-i muhtârı bâ‘isü hâzihi’l-vesîka Hâfız Veliyüddin Efendi b. Hüseyin mahzarında ikrâr ve takrîr-i kelâm edip ben işbu sene-i mübârekede hacc-ı şerîfe azîmet etmemle bi-emri’llâhi te‘âlâ vedâ‘-ı âkilem ni [âlem-i fânî] eylediğimde cemî‘ terekemden düyûn-ı müsbetem ba‘de’l-kazâ sülüsünden on guruş hediyeli iki Mushaf-ı şerîf iştirâ ve her biri birer müstahik kimesnelere verile ve otuz guruş ıskāt-ı salâtım ve beşer guruş kefâret-i yemîn ve savmım için fukarâya devroluna ve vasiyy-i muhtârım mezbûr Hâfız Veliyüddin Efendi’ye yirmi guruş ve imâm-ı mezbûr Ahmed Efendi’ye iki buçuk guruş ve on guruş talebe-i ulûma ve dörder nefer kimesnelere dört hatm-i şerîf ettirilip her birine birer yıldız altını verile ve zikrolunan hatm-i şerîfler du‘âsında on guruş ile tabh-ı ta‘âm ve itmâm-ı fukarâ oluna ve mâ‘adâ terekem veresem beyninde alâ-mâ-farazallâhu te‘âlâ tevzî‘ ve taksîm oluna deyü vasiyyet ve tenfîzine mezbûr Hâfız Veliyüddin Efendi’de <> vasiyy-i muhtâr, işbu Osman Beşe b. Ali’yi nâzır nasb ve ta‘yîn eyledim dedikde onlar dahi zikrolunan vesâyet ve nezâreti her bir kabûl ve merâsimin edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Recebi’l-ferd li-sene selâse ve erba‘în ve mi’e ve elf. Şuhûdü’l-hâl: İmâm Ahmed Efendi b. Ali, es-Seyyid Ahmed b. Seyyid Mehmed, Na‘lba[n]d Osman Bey b. Ali, Osman Efendi b. Mustafa, Hilâlcı Musa Çelebi b. Hasan, Ömerzâde Ahmed Ağa, es-Seyyid Mehmed Çelebi b. es-Seyyid Ali.>>