Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 84 Hüküm no: 78 Orijinal metin no: [13b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yakub’un bakırcı Mehmed’e olan borcunu ödemesi. Ma‘rûz; İstanbul’da Sultan Bâyezid Câmi‘-i şerîfi kurbünde bakırcı tâifesinden Mehmed hasmı Üsküdar’da Yakub nâm kimesne ile mürâfa‘a-i şer‘ oldukda mezbûr Yakub târih-i i‘lâmdan kırk gün mukaddem yedimden istikrâz ve kabz eylediği kırk guruş hakkımın on guruşunu kabz edip bâkī otuz guruş hakkım zimmetinde iken ba‘dehû bi’d-defa‘ât bin yüz otuz akçe dahi istidâne ve kabz ve cem‘an zimmetinde dört bin yedi yüz otuz akçe hakkım olmağla taleb ederim deyü ba‘de’d-da‘vâ mezbûr Yakub cevâbında bi’d-defa‘ât bin yüz otuz akçe istidâne ve kabz eylediğini ikrâr lâkin cihet-i karzdan bâkī otuz guruş deyni olduğunu inkâr etmekle müdde‘î-i mezbûr ber-vech-i muharrer müdde‘âsını udûlden ve câmi‘-i mezbûr kurbünde kalaycı Ali Çelebi b. Mehmed ve Halil b. Mehmed nâm kimesneler şehâdetleriyle vech-i şer‘î üzere isbât etmeğin mûcebince meblağ-ı merkūm otuz guruş ile mertebe-i ikrârı olan bin yüz otuz akçeyi edâ ve teslîme mezbûr Yakub’a tenbîh olunduğu bi’l-iltimâs huzûr-ı âlîlerine i‘lâm olundu. Fî 29 Cumâdelûlâ sene [1]154