Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 85 Hüküm no: 79 Orijinal metin no: [13b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abraham’ın kefaletten dolayı Erzincanlı Mustafa b. Ömer b. Abdullah’a olan borcunu ödemesi Ma‘rûz; Fi’l-asl vilâyet-i Anadolu’da Ezircan kasabası ahâlîsinden el-Hâc Mustafa b. Ömer b. Abdullah tarafından ber-vech-i âtî vekîl olduğu mahmiye-i İstanbul’da hâlâ defter emîni efendi etbâ‘ından es-Seyyid Mehmed b. İbrahim ve es-Seyyid İbrahim b. Molla Mustafa nâm kimesneler şehâdetleriyle mahzar-ı hasm-ı câhidde vekâleti şer‘an sâbit olan es-Seyyid Mehmed b. es-Seyyid İbrahim hasmı olup medîne-i Üsküdar’da sâkin Abraham v. Artin nâm zimmî ile mürâfa‘a-i şer‘-i şerîf oldukda Abraham ile gāib ani’l-meclis Mardiros v. Norsis nâm zimmî bin yüz elli üç senesi Zilka‘desi’nin onuncu günü târihiyle müverrah temessük mantûkunca cihet-i karz-ı şer‘îden yetmiş yedi buçuk guruş istikrâz ve kabz ve her biri meblağ-ı mezbûrdan âharın zimmetine lâzım gelen meblağ emr ve kabûlü hâviye kefâlet-i sahîha-i şer‘iyye ile kefîl ve dâmin olmalarıyla meblağ-ı merkūm yetmiş yedi buçuk guruş asâlet ve kefâletine binâ’en mezbûr Abraham’dan bi’l-vekâle taleb ederim deyü ba‘de’d-da‘vâ ve’l-inkâr müdde‘î-i mezbûr müdde‘âsını lede’t-tezkiye adâletleri zâhir şâhidân-ı mezbûrân es-Seyyid Mehmed ve es-Seyyid İbrahim şehâdetleriyle vech-i şer‘î üzere isbât etmeğin mûcebince meblağ-ı merkūmu asâlet ve kefâletine binâ’en edâ ve teslîme mezbûr Abraham zimmîye tenbîh olunduğu bi’l-iltimâs huzûr-ı âlîlerine i‘lâm olundu. Fî-selhi Cumâdelûlâ sene [1]154