Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 85 Hüküm no: 80 Orijinal metin no: [14a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kesilecek sığırların eskiden olduğu gibi diri olarak Beşiktaş’tan Üsküdar’a nakledilmesi Ma‘rûz-ı dâ‘î-i devletleridir ki; Derûn-ı arzuhâlde mezkûr husûsun hakīkati ve nizâm-ı kadîmi Yedikule’ye gelen sığırdan Üsküdar’da sığır kasabı hissesini aldıkda Beşiktaş’dan Üsküdar’a hayyen geçip selhhânesinde zebh ve lahmı kasab-ı mezbûr ve iç yağını mumcu ve paçasını paçacı ve işkenbesini işkenbeci alıp bu vechile intifâ‘ edegelirler iken birkaç seneden beri hayyen geçmediğinden Yedikule ve Beşiktaş nâm mahâlde zebh olunmağla yalnız lahmı geçip mâ‘adâsı zebh olunduğu mahâlde bulunan esnâf aldığından mumcu ve paçacı ve işkenbeci mutazarrır, mumcu tâifesinin yedinde olan bin yüz kırk dokuz ve elli bir seneleri târihleriyle müverrah iki kıt‘a emr-i âlî mûceblerince lahm ve şahmı geçmek üzere iken yine zebh olunduğu mahâlde bulunan esnâf yedlerinde olan senedât mûcebince vermediklerinden bir vechile icrâsı mümkün olmayıp ve hayyen Üsküdar’a sığır geçmemek üzere men‘i içün sicillâtda kaydı olmayıp nizâm-ı kadîme Yedikule’den Üsküdar hissesi içün verilen sığır Beşiktaş’dan Üsküdar’a hayyen geçip Üsküdar’da selhhânede zebh ve lahmını kasab ve iç yağını mumcu ve işkenbesini işkenbeci ve paçasını paçacı alıp ibâdullâha bey‘ etmek nizâm-ı kadîmdir ve nizâm-ı kadîm üzere harekete müsâ‘ade buyurulup fermân-ı âlî sâdır oldukda ecr-i azîmdir ve fukarânın zarûreti def‘ ile ecre nâ’il olmaları emr ü muhakkak olmağın vâki‘ hâl atabe-i aliyyelerine arz ve i‘lâm olundu. Bâkī fermân hazret-i veliyyü’l-emrindir. Fî-gurreti Cumâdelâhire sene [1]154