Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 89 Hüküm no: 89 Orijinal metin no: [15a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahalle arasında altı dükkânlı bina yapmak isteyen Yusuf’a izin verilmediği Ma‘rûz; Ashâb-ı arzuhâl Üsküdar’da Hayreddin Çavuş mahallesi İmâmı Mustafa Efendi ve Müezzin Mustafa Halîfe ve ahâlî-i mahalleden es-Seyyid Ebûbekir Ağa ve Şa‘îrîzâde Mehmed Ağa ve Hasan Ağa ve diğer Mehmed Ağa ve sâir müseccelü’l-esâmî kimesneler derûn-ı arzuhâlde mezkûrü’l-ism Yusuf muvâcehesinde mahalle arasında mezbûr Yusuf mutasarrıf olduğu arsa üzerine müceddeden menzil binâsına mübâşeret ve menzil-i merkūm tahtında bakkāl ve çörekçi fırını ve attar dükkânı ihdâs murâd etmekle kadîmden mahalle-i merkūmda dükkân olmayıp mahalle arasında mezbûr Yusuf’un ihdâs murâd eylediği dekâkin binâ olunmak iktizâ etdikde mahâll-i merkūm tecemmu‘ yeri olup erâzil ve eşhâs cem‘ ve bir vechile emniyet mümkün olmadığından pencerelerin karşısında olduğuna binâ’en menzilimizde iyâl ve evlâdlarımızın rahatı ref‘ ve mürûr ve ubûr eden nisvân tâifesi ihtirâz ederler deyü muvâcehesinde teşekkî [ve] mezbûr Yusuf dahi ber-vech-i muharrer mu‘terîf olmağın fi’l-vâki‘ mahâll-i merkūm mahalle arası olmağla binâ olunduğu takdîrce erâzil ve eşhâs cem‘ olması mukarrer olup memnû‘âtdan olduğu ecilden mezbûr Yusuf dekâkin-i merkūme binâsından şer‘an men‘ olunduğu bi’l-iltimâs huzûr-ı âlîlerine i‘lâm olundu. Fî 10 Cumâdelâhire sene 1154