Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 90 Hüküm no: 91 Orijinal metin no: [15b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Şatır Mehmed’in karısı Fatma’nın kızı Rukiye’ye olan borcunu ödemesi Ma‘rûz; Derûn-ı arzuhâlde mezkûr müteveffâ Şâtır Mehmed’in verâseti zevcesi Fâtıma ile sulbî kebîr oğulları Mehmed ve Hasan ve sulbiye kebîre kızları Âişe ve Râbia’ya münhasıra olduğu şer‘an tahakkukundan sonra sahibe-i arzuhâl mezbûre Râbia derûn-ı arzuhâlde mezkûrü’l-ism vâlidesi mezbûre Fâtıma ile dîvân-ı âlîlerinde ma‘kūd meclis-i şer‘de ba‘de’t-terâfu‘ babam müteveffâ-yı mezbûrdan müntakil Cağalzâde Vakfı’ndan Üsküdar’da vâki‘ iki bâb arpacı dükkânı ve bir bâb menzilde olan hisse-i irsiye-i şâyi‘am anam mezbûre zimmetinde kalmağla taleb ederim deyü ba‘de’d-da‘vâ mezbûre Fâtıma cevâbında bir sene mukaddem İstanbul Kassâmı Halil Efendi imzâsıyla mümzât ve hâtemi ile mahtûm bir kıt‘a ibrâ hücceti mantûkunca yüz on guruşa sulh olup meblağ-ı merkūmun kırk beş guruşu[nu] def‘ ü teslîm eyledim deyü def‘ edicek müdde‘iye-i mezbûre ber-vech-i muharrer ibrâ hüccetini ikrâr lâkin bedel-i sulh olan meblağ-ı merkūmdan kırk beş guruşu ahzını inkâr etmekle mezbûre Fâtıma ityân-ı beyyineden izhâr-ı acz ile istihlâf etmeğin talebiyle işbu müdde‘iye-i mezbûre Râbia ba‘de’t-tahlîf mûcebince meblağ-ı merkūm yüz on guruşu edâ ve teslîme mezbûre Fâtıma’ya tenbîh olunduğu mübâşiri çavuş kulları iltimâsıyla huzûr-ı âlîlerine i‘lâm olundu. Fî 12 Cumâdelâhire sene [1]154