Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 92 Hüküm no: 95 Orijinal metin no: [16a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arslan ismiyle tanınan Yahudi Yuda’nın vefat eden Osman’a olan borcunu ödediği Ma‘rûz; Derûn-ı arzuhâlde mezkûr Bulgurlu karyesinden müteveffâ el-Hâc Osman’ın veresesi dîvân-ı âlîlerinde İbrahim Çavuş kulları mübâşeretiyle ba‘de’t-terâfu‘ Üsküdar’a havâle olundukdan sonra müteveffâ-yı mezbûrun verâseti sulbî kebîr oğulları Mehmed ve Ali’ye ve sulbiye kebîre kızı Fâtıma’ya münhasıra olduğu şer‘an tahakkukundan sonra kendi nefsinden asıl ve karındaşı Ali tarafından vekîl-i sâbitü’l-vekâlesi Mehmed asâleten ve vekâleten derûn-ı arzuhâlde mezkûr hasmı Yuda nâm-ı diğer Arslan nâm Yahûdî tarafından ber-vech-i âtî sâbitü’l-vekâle vekîli olan Mayer nâm Yahûdî ile mürâfa‘a-i şer‘-i şerîf olundukda bin yüz kırk iki senesi târihiyle müverrah tezkirede tahrîr olunduğu vech üzere yaş üzüm semeninden üç yüz kırk guruş hakkı olup babamız müteveffâ-yı mezbûrun hesâbına dâhil olmayıp müvekkil-i merkūm Yuda’dan kable’l-ahz fevt olmağla hisse-i irsiye-i ma‘lûmemi bi’l-asâle ve bi’l-vekâle taleb ederim deyü da‘vâ ettikde vekîl-i mezbûr cevâbında bin yüz kırk altı târihiyle müverrah hüccet-i şer‘iyye mûcebince altı yüz guruş hesâbımıza dâhil olup ol vechle müteveffâ-yı mezbûr hayatında ahz ü istifâ eylediğini nâtık i‘tâ eylediği hüccet-i şer‘iyyenin zeylinde isimleri mastûr olup lede’t-tezkiye adâletleri zâhir İsmail b. Hasan ve Mustafa b. Hasan nâm kimesneler şehâdetleriyle mazmûn-ı hücceti vech-i şer‘î üzere isbât etmeğin mûcebince müdde‘î-i mezbûr bî-vech mu‘ârazadan men‘ olunduğunu ber-mûceb-i fermân-ı âlî mübâşirleri iltimâsıyla huzûr-ı âlîlerine i‘lâm olundu. Fî 12 Cumâdelâhire sene [1]154