Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 348 Hüküm no: 347 Orijinal metin no: [78a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Abdullah’ın borcuna takas olmak üzere bazı eşyalarını Emetullah Hatuna sattığı Husûs-ı âti’z-zikrin mahallinde ketb ü tahrîri için <> bi’l-iltimâs savb-ı şer‘-i şerîf-i enverden irsâl olunan Mevlânâ el-Hâcı Mustafa Efendi b. Mehmed mahmiye-i İstanbul’da Haydarhâne Mahallesi’nde sâkin Osman Efendi b. Abdürrahim nâm kimesnenin menziline varıp zeyl-i vesîkada muharrerü’l-esâmî Müslimîn huzûrunda akd-i meclis-i şer‘-i nebevî ettikde mahmiye-i mezkûrede Sofular Mahallesi’nde mütemekkine olup zâtı İmâm Mehmed Efendi b. Ali ve Kayyum Hüseyin Efendi b. İbrahim ta‘rîfleriyle mu‘arrefe olan Fâtıma bt. Abdullah b. Abdürrahim nâm hatun meclis-i ma‘kūd-ı mezkûrda işbu bâ‘ise[tü]’l-vesîka Emetullah bt. Osman Efendi b. Abdürrahim nâm hatun tarafından husûs-ı âti’l-beyânı tasdîka vekîl olduğu nehc-i şer‘î ve tarîk-i mer‘î üzere sâbit olan mezbûr Osman Efendi mahzarında ikrâr ve takrîr-i kelâm edip eşyâ-i memlûkemden mecmû‘u üç sagīr minder ve yedi beledî yastık ve iki beledî döşek ve iki yemenî yorgan ve iki yemenî mak‘ad ve bir yeşil ve mâvi iki beğlik çuka ve yeşil çukaya kaplı bir nâfe kürk ve bir beyâz keçe ve bir alaca kapı perdesi ve bir seccâde ve iki sarı kebe ve üç yemenî yüz yastığı ve bir ocak perdesi ve bir bez-i sofra ve bir peşkir ve üç gömleklik kettân bezi ve iki alaca yemenî boğça ve on zirâ‘ kettân ipliği ve iki makreme ve bir mâvi peştamâl ve iki beyâz zıbın ve bir sandık ve bir tahta sandık ve bir destgâh ve bir iskemle ve satır ve bir yassı ağaç ve iki teneke ve bir kettân tarağı ve iki tennûr ve iki Mısır hasırı ve iki nerdübân ve bir küp ve bir balta ve bir bel ve bir mikdâr odun ve bir leğen ma‘a ibrik ve dört tencere ma‘a kapak ve bir maşrapa ve iki tâbe ve iki kahve ibriği ve iki sagīr tas ve bir hoşâb tası ve bir hamam tası ve beş kebîr sahan ve yedi sagīr lengerî ve üç şam‘dân ve bir ma‘den-i kılabdânımı tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î [ile] müvekkile-i mezbûre Emetullah nâm hatuna yüz yetmiş guruşa bi-safkatin vâhidetin bey‘ ve temlîk ve teslîm ve semen-i mezbûru cihet-i karzdan müvekkile-i mezbûre zimmetinde deynim olan yüz yetmiş guruşa takās ve mahsûb eylediğimde ol dahi ber-vech-i muharrer iştirâ ve tesellüm ve kabz ve kabûl eyledikden sonra husûsu mezkûre müte‘allika âmme-i da‘vâdan müvekkile-i mezbûre Emetullah Hatun’un zimmetini ibrâ ve iskāt eyledim. Ba‘de’l-yevm eşyâ-i muharrere-i mezkûre müvekkile-i mezbûre Emetullah Hatun’un mülk-i müşterâsı olup benim kat‘â alâka ve medhalim kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ma‘an ba‘s olunan ümenâ-i şer‘le meclis-i şer‘a gelip alâ-vukū‘ihî inhâ ve tefhîm etmeğin mâ-vaka‘a bi’t-taleb ketb olundu. Fi’l-yevmi’r-râbi‘ min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: eş-Şeyh Ebûbekir Efendi b. Mustafa, es-Seyyid Hüseyin Efendi b. es-Seyyid Ömer, Mehmed Ağa b. Ahmed, Molla Ali b. Mehmed, es-Seyyid Osman b. es-Seyyid Yusuf, Molla Süleyman b. Ahmed, İbrahim Çelebi b. Mustafa, Abdürrahim b. Nâbi‘ Efendi.