Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 97 Hüküm no: 108 Orijinal metin no: [18a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Öldürüldüğü iddia olunan Veli’nin ölümü ve terekesi hakkında araştırma yapılması Ma‘rûz; Derûn-ı arzuhâlde mezkûr duhan bâzârgânlarından Gümülcine sâkinlerinden İznikmid’de te’ehhül edip vefât eden es-Seyyid Veli’nin evlâdlarından arzuhâl sahipleri es-Seyyid Halil ve es-Seyyid Mehmed nâm karındaşlar müteveffâ-yı mezbûrun vefâtından sonra Üsküdar’da Mirahur mahallesine gelip Ali Çavuş kulları mübâşeretiyle bâ-fermân-ı âlî meclis-i şer‘a ihzâr olunan zevce-i menkûha-i metrûkesi olup zâtı ta‘rîf-i şer‘î ile mu‘arrefe olan Fâtıma ile ba‘de’t-terâfu‘ babamız müteveffâ-yı mezbûru zevce-i mezbûre Fâtıma katlettirip hîn-i fevtinde nukūd ve eşyâ-i ma‘lûmesini ketm ve ihfâ eylemişdir deyü da‘vâ ettiklerinde mezbûre Fâtıma cevâbında yedi ay mukaddem zevcim müteveffâ-yı mezbûr es-Seyyid Veli İznikmid kādısı ve İznikmid vâlîsi ma‘rifetleriyle sâkine olduğum menzil tahtında mahzen içinde derûn-ı kenîfden cenâzesini ihrâc olundukda müteveffâ-yı mezbûrun mâlı olmak üzere yedimde mahfûz beş yüz elli guruşluk boyun altunu ile yüz elli guruş zimem temessükünü vâlidem olup hâlâ İznikmid cânibine giden Âmine yediyle vâlî-i mûmâ-ileyh tarafına irsâl ol vechile istihlâk eylediğini ve kātili ismi ma‘lûmum olmayan bir saka ile mahzen-i merkūmda şurb-i hamr ederler idi gece hâlinde gāib-i mezbûr saka katletmişdir deyü tescil-i şer‘î olup meblağ-ı mezbûr müteveffâ-yı mezbûrun mâlı olduğunu ikrâr eder hakīkat-i hâl minvâl-i muharrer üzere olduğu şer‘an beyâna muhtâc olmağla mübâşir iltimâsıyla keyfiyet-i tescîl huzûr-ı âlîlerine i‘lâm olundu. Fî 2 Recebi’l-ferd sene 1154