Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 98 Hüküm no: 110 Orijinal metin no: [18b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuzguncuk ahalisinin huzurlarını bozan Yahudi İsak’tan şikayetçi oldukları Ma‘rûz; Üsküdar’a tâbi‘ Kuzguncuk karyesi re‘âyâsından müseccelü’l-esâmî Yahûd tâifesi meclis-i şer‘a gelip yine tâife-i mezbûreden olup Kaya Sultan odalarında müste’cir İsak nâm Yahûdî gâh birimizden ve gâh bir gayriden alacağım vardır deyü iddi‘â ve ba‘dehû kendüyi ihfâ edip bir vechile kendi hâlinde olmayıp karyemizde sâkin bu def‘a dahi Yako nâm Yahûdî’de altmış guruş alacağım vardır deyü ifk ü iftirâ ve dâimâ şirret da‘vâlarda geşt ü güzâr, taraf-ı şer‘den muhzır irsâl ve bizler geldikde mezbûr firâr ve gaybet edip bu vechile mezbûr İsak’dan emniyetimiz olmayıp şerîr olduğunu der-i devlet-medâra arz ve i‘lâm ediver deyü ilhâh etmeleriyle fî-mâ ba‘d kendi hâlinde olmak üzere tenbîhi müş‘ir yedlerine emr-i şerîf-i âlîşân ihsân buyurulmak iltimâs eyledikleri huzûr-ı âlîlerine i‘lâm olundu. Fî 7 Cumâdelâhire sene 1154