Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 99 Hüküm no: 112 Orijinal metin no: [18b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uygunsuz hareketleri dolayısıyla Duhanî Ahmed’in mahalleden ihracı Ma‘rûz; Üsküdar’da Kefçe mahallesi İmâmı Hasan Efendi ve Müezzin İbrahim Halîfe ve ahâlî-i mahalleden Abdülmü’min Ağa ve Süleyman Ağa ve es-Seyyid Mustafa ve Hasan ve sâir müseccelü’l-esâmî cemm-i gafîr meclis-i şer‘de mahalle-i mezbûre sâkinlerinden Duhânî Ahmed muvâcehesinde mezbûr Ahmed kendi hâlinde olmayıp müzmin-i hamr ve menziline nâ-mahrem avratlar götürüp fısk ü fesâdını i‘lan ve bundan akdem bi’d-defa‘ât mezbûr Ahmed’e tenbîh olundukda mütenebbih olmayıp mahalleden ihrâc ettirirseniz mahallenizi bir kazâya uğratırım deyü bir vechile mezbûrun fısk ü şekāvetinden hâb ve râhatımız bi’l-külliye ref‘ olunmuşdur deyü sû-i hâlini muvâcehesinde ihbâr ve mahalle-i mezbûrdan ihrâcı içün fermân-ı âlî ricâ ettikleri bi’l-iltimâs huzûr-ı âlîlerine i‘lâm olundu. Fî 7 Recebi’l-ferd sene 1154