Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 99 Hüküm no: 113 Orijinal metin no: [18b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kezban Hatun’un aldığı vakıf menzil ve tarlayı vakfın mütevellisi satışa izin vermediği için iade etmesi Ma‘rûz; Sahib-i arzuhâl Veli b. Ali meclis-i şer‘de derûn-ı arzuhâlde mezkûrü’l-ism olup zâtı vech-i şer‘î üzere mu‘arrefe olan Kezban bt. Süleyman nâm hatun muvâcehesinde Üsküdar hâricinde Sultançiftliği demekle ma‘rûf vakıf karyenin mütevellîsi tarafından vekîl olan karye-i mezbûre mültezimi Ali Ağa hazır olduğu [hâlde] mürâfa‘a-i şer‘-i şerîf olduklarında karye-i mezbûre Üsküdar’da vâki‘ merhûme ve mağfûrun-lehâ Atîk Vâlide Sultan Câmi‘-i şerîfi ve İmâret-i âmiresi Evkāfı akārâtından Kûh-ı Âlem? kurbünde vâki‘ olup vakıf karyede icâre-i mu‘accele ve mü’eccele ile mütevellî-i vakf temessükü ile babam müteveffâ Ali’den müntakil ma‘lûmü’l-hudûd ve’l-müştemilât bir bâb vakıf menzil ve menzil-i merkūm kurbünde vâki‘ zirâ‘at olunan vakıf tarlamı dört yüz elli guruş [19a] bedel mukābelesinde mezbûre Kezban Hatun’a ma‘rifet-i mütevellî ile ferâğ ve tefvîz etmek üzere mezbûre Kezban ile kavl ve bedel-i merkūmdan iki yüz guruşunu kabz etmiş idim. Hâlâ izn-i mütevellî olmamağla medfû‘u olan iki yüz guruşunu yedimden geri kabz ve menzil-i merkūm ile tarla-yı merkūmdan kasr-ı yedine tenbîh olunmak matlûbumdur deyü da‘vâ ettikde mezbûre Kezban cevâbında fi’l-hakīka hâl müdde‘î-i mezbûrun bâlâda bast ü beyân ve tafsîl ü ayân eylediği vech üzere olup hâlâ izn-i mütevellî ile ferâğ ve tefvîz olunmadığını bi tav‘ıhâ ikrâr ve i‘tirâf etmeğin husûs-ı mezbûrda mütevellî-i vakf temesükü ile amel olunagelmeğin bu sûrette izn-i mütevellî olmamağla tarafeynin kavilleri mu‘teber olmayıp ikrâr mûcebince meblağ-ı merkūm iki yüz guruşu mezbûre Kezban Hatun teslîm ve kabz ve zikrolunan menzil ve tarladan kasr-ı yed ve sahib-i arzuhâl Veli’ye red ve teslîm olunmak iktizâ eylediği ber-mûceb-i fermân-ı âlî huzûr-ı âlîlerine i‘lâm olundu. Fî 7 Recebi’l-ferd sene 1154