Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 100 Hüküm no: 114 Orijinal metin no: [19a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar ve civarında Rus esirlerin barındırılmadığı Ma‘rûz; Moskov üsârâsı içün şeref-bahş-ı sudûr bulan fermân-ı vâcibü’l-ittibâ‘ ve lâzımü’l-imtisâlin mazmûn-ı münîfi ta‘yîn buyrulan Küçük İsmail Ağa kulları mübâşeretiyle nefs-i Üsküdar’da vâki‘ mahallât ve hâric-i Üsküdar’da olan kurâ imâmlarına ve nevâhî nâiblerine ve re‘âyâ tâifesinin papaz ve cemâ‘at başları ve hahamlarına mantûk-ı emr-i âlî gereği gibi tefhîm ve tenbîh-i ekîd olundukda mukaddemâ sâdır olan emr-i âlîşân mûcebince bulunan kimesneler teslîmi lâzım gelen mahalle teslîm ile taraf-ı Devlet-i aliyye’den ihsân buyrulan akçelerini ahz edip el-yevm Üsküdar kazâsında zükûr ve inâs Moskov üserâsı olmadığını cümle ittifâk ve ittihâd ve zuhûr eder ise yine fermân-ı âlî üzere teslîm olunacak mahalle teslîme ta‘ahhüd ve iltizâm ettikleri mübâşir kulları iltimâsıyla vâki‘ hâl atabe-i aliyyelerine arz ve i‘lâm olundu. Fî 7 Cemâziyelâhir sene 1154