Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 100 Hüküm no: 115 Orijinal metin no: [19a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İvaz’ın Hancı Mehmed’e olan borcunu ödemesi Ma‘rûz; Üsküdar’da kolluk kurbünde Yeni Han odabaşısı İvaz zimmî hân-ı mezkûr hancısı Mehmed ile ba‘de’t-terâfu‘ bin yüz elli iki senesi Ramazan-ı şerîfi gurresinden bin yüz elli dört senesi Cumâdelâhire gāyetine gelince beher mâh üçer guruş ücret ile hân-ı mezbûrda odabaşılık hizmetinde istihdâm edip ol vechile yirmi iki ay müstehak olduğum ücretimden dokuz guruşunu ahz edip elli yedi guruş hakkım bâkī kalmışdır deyü da‘vâ ve müdde‘âsını udûlden es-Seyyid Mehmed Çelebi b. İsmail ve es-Seyyid Ömer b. el-Hâc Ali ve Molla İsmail b. Mustafa nâm kimesneler şehâdetleriyle vech-i şer‘î üzere isbât ettikden sonra mezbûr Mehmed târih-i mezbûrda müdde‘î-i mezbûr ile fesh-i icâre etmiş idim deyü eylediği da‘vâsını beyâna kādir olmamağla zimmî-i mesfûr ba‘de’t-tahlîfi’ş-şer‘î mûcebiyle meblağ-ı bâkī merkūm elli yedi guruşu müdde‘î-i mezbûra edâ ve teslîme mezbûr Mehmed’e tenbîh olunduğu bi’l-iltimâs huzûr-ı âlîlerine i‘lâm olundu. Fî 10 Receb sene 1154