Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 104 Hüküm no: 124 Orijinal metin no: [21a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Katırcı İzzeddin’in havaleden dolayı Hasan’a olan borcunu ödemesi Ma‘rûz; Fi’l-asl Şâm-ı Şerîf ahâlîsinden Üsküdar’da müsâferet vechi üzere sâkin es-Seyyid Hasan hasmı katırcı tâifesinden İzzeddin ile mürâfa‘a-i şer‘ olduklarında târih-i i‘lâmdan sekiz ay mukaddem yine Şâm-ı Şerîf ahâlîsinden gāib ani’l-beled Ebûbekir nâm kimesnenin mezbûr İzzeddin’den beş yüz guruş hakkı olup dört yüz guruşunu ahz bâkī yüz guruşunu üçümüz bir mahâlde olduğumuz hâlde bana havâle ve her birimiz havâleyi kabûl edip cihet-i merkūmeden olan yüz guruşu mezbûr İzzeddin’den taleb ederim deyü ba‘de’d-da‘vâ ve’l-inkâr müdde‘î-i mezbûr müdde‘âsını udûlden yine Şâm-ı Şerîf ahâlîsinden olup Üsküdar’da müsâfiren el-Hâc Mehmed b. el-Hâc Ahmed ve es-Seyyid Ahmed b. Osman nâm kimesneler şehâdetleriyle vech-i şer‘î üzere isbât etmeğin mûcebince meblağ-ı merkūm yüz guruşu müdde‘î-i mezbûra edâya mezbûr İzzeddin’e tenbîh olunduğu bi’l-iltimâs huzûr-ı âlîlerine i‘lâm olundu. Fî 19 Receb sene 1154