Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 106 Hüküm no: 129 Orijinal metin no: [21b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boğularak ölen İsmail Bey’in terekesinin taksiminde çıkan ihtilafın giderilmesi Ma‘rûz; Üsküdar’da Mirahur mahallesinde sâkin iken bundan akdem garîkan fevt olan İsmail Bey b. Süleyman b. Abdullah’ın verâseti zevce-i menkûhası Hayrunnisa Hanım’a ve sulbî kebîr oğlu sahib-i arzuhâl Süleyman’a ve sulbiye kebîre kızı Âişe’ye münhasıra olduğu şer‘an tahakkukundan sonra mezbûr Süleyman kendi tarafından asıl ve mezbûretân Hayrunnisa ve Âişe taraflarından vekîlleri olmağla vekâleten derûn-ı arzuhâlde mezkûr akrabâlarından İbrahim Ağa muvâcehesinde mûrisimiz müteveffâ-yı mezbûr İsmail Bey hâl-i hayatında mutasarrıf olduğu vazîfesinden müctemi‘ kendi mâlından mezbûr İbrahim Ağa’ya dört yüz yirmi guruş ikrâz ve teslîm eyledikde ol dahi iktirâz ve tesellüm ve meblağ-ı merkūmu kendi mesârifine sarfla istihlâk ettikden sonra bin yüz kırk dört senesinde mezbûr İbrahim Ağa medîne-i Adana mahkemesinde huzûr-ı şer‘de cihet-i merkūmeden meblağ-ı merkūm dört yüz yirmi guruş babam müteveffâ-yı mezbûr İsmail Bey zimmetinde vâcibü’l-edâ deyni olduğunu ikrâr ve işhâd edip kable’l-ahz mûrisimiz müteveffâ-yı mezbûr İsmail Bey fevt olup meblağ-ı merkūm bize mevrûs olmağla bi’l-vekâle ve bi’l-asâle taleb ederim deyü ba‘de’d-da‘vâ ve’l-inkâr müdde‘î-i mezbûr müdde‘âsını lede’t-tezkiye adâletleri zâhir Osman Ağa b. Mehmed ve diğer Osman Halîfe b. Mustafa nâm kimesneler şehâdetleriyle vech-i şer‘î üzere isbât etmeğin mûcebince meblağ-ı [mezbûr] dört yüz yirmi guruşu edâya tenbîh olunduğu mübâşiri Süleyman Çavuş kulları iltimâsıyla huzûr-ı âlîlerine i‘lâm olundu. Fî 25 Recebi’l-ferd sene 1154