Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 112 Hüküm no: 142 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tophaneli Mehmed b. Mustafa’nın kiraladığı kasap dükkânını boşaltması Ma‘rûz; İstanbul’da Bahçekapısı’nda sâkin Abdülbaki Ağa tarafından vekîl-i sâbitü’l-vekâlesi Ebûbekir nâm kimesne müvekkil-i mezbûrun medîne-i Üsküdar’da kolluk kurbünde kasap dükkânında müşâhereten müste’ciri olan Tophâneli Mehmed b. Mustafa ile ba‘de’t-terâfu‘ beher mâh yüz altmış birer para icâre ile dükkân-ı merkūm’da müste’ciri olup beynlerinde olan icâreyi fesh ve târih-i i‘lâm-ı şehri gāyetinde ba‘de’t-tahliye müvekkil-i mezbûra teslîm olunmak üzere mezbûr Mehmed’e tenbîh olunmak bi’l-vekâle matlûbumdur deyü da‘vâ ettikde mezbûr Mehmed ber-vech-i muharrer müşâhereten dükkân-ı merkūmda müste’ciri olduğunu ikrâr ve i‘tirâf etmeğin mûcebince târih-i i‘lâm şehri gāyetinde ba‘de’t-tahliye dükkân-ı merkūmu teslîme mezbûr Mehmed’e tenbîh olunduğu mübâşiri iltimâsıyla huzûr-ı âlîlerine i‘lâm olundu. Fî 16 Şa‘bân sene 1154