Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 113 Hüküm no: 143 Orijinal metin no: [24a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un borcunu ödediği Ma‘rûz; Üsküdar’da Selman Ağa mahallesinde sâkine Âişe Hatun hasmı olup zâtı vech-i şer‘î üzere mu‘arrefe olan Hatice nâm hatun ile mürâfa‘a-i şer‘-olduklarında cihet-i karzdan bâ-temessük istikrâz eylediği yetmiş guruş deyni içün bilâ-devr-i şer‘î mezbûre Hatice mezbûre Âişe yedinden otuz bir buçuk guruş ber-mûceb-i fetvâ-yı şerîfe asl-ı mâla hesâb olunup ve üç buçuk guruşu dahi mezbûre Hatice zâyi‘ eylediği sîm kutu içün rızâlarıyla zammolundukda bu vechle otuz beş guruşunu mukaddemâ istîfa ve bâkī otuz beş guruşu dahi meclis-i şer‘de mezbûre Âişe yedinden ahz ü kabz edip defter-i müfredât mûcebince olan bakī rehânı rehniyetten ba‘de’l-fek mezbûre Âişe’ye tamamen teslîm ol dahi ahz ü kabz edip birbiriyle da‘vâ ve husûmetleri kalmayıp her biri âharın zimmetini ibrâ ve ıskāt eylediği ba‘de’t-tescîl bi’l-iltimâs huzûr-ı âlîlerine i‘lâm olundu. Fî 14 Şa‘bân sene 1154