Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 113 Hüküm no: 144 Orijinal metin no: [24a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tersane ihtiyaçları için kesilen fundalara müdahale edilmeyeceğine dair taahhüde bulunulduğu Ma‘rûz; Mîrî fundacısı olan Ümmü Gülsüm Hatun Üsküdar’a tâbi‘ Bulgurlu karyesi İmâmı Abdülmennan ve Subaşı el-Hâc Mehmed ve el-Hâc Mustafa nâm kimesneler muvâcehelerinde yedimde olan müte‘addid evâmir-i aliyyeler mûceblerince Tersâne-i âmire’de kalyonlar içün iktizâ eden fundayı kadîmi üzere kat‘ olunageldiği vech üzere karye-i mezbûre ve etrâf dağlardan arabacılarınca kat‘ ve nakledegelmişler iken mezbûrlar hazır bi’l-meclis Arabacı Ahmed’in mîrî içün kat‘ eylediği fundayı ihrâk etmeleriyle umûr-ı mühimmenin ta‘tîline bâ‘is olurlar deyü teşekkî ettikde merkūmûn İmâm Abdülmennan ve Subaşı el-Hâc Mehmed ve el-Hâc Mustafa nâm kimesnelerden her biri fî-mâ ba‘d hilâf-ı fermân-ı âlî hareket etmeyip funda kat‘ına mümâna‘at etmemek üzere meclis-i şer‘de ta‘ahhüd ettikleri Mübâşir Süleyman Haseki kulları iltimâsıyla huzûr-ı âlîlerine i‘lâm olundu. Fî 19 Şa‘bân sene 1154