Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 118 Hüküm no: 156 Orijinal metin no: [26a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Mehmed’in Sütçü İbrahim’den aldığı bargirin parasını ödemesi. Ma‘rûz; Vâki‘ olan mevâddı istimâ‘ içün kıbel-i şer‘den me’zûnen irsâl olunan Mevlânâ Mehmed Emin Efendi dâ‘îleri Üsküdar’a tâbi‘ Kādıkaryesi’ne varıp ba‘de akdi’l-meclis karye-i mezbûre sâkinlerinden Sütçü İbrahim hasmı olup yine karye-i mezbûre ahâlîsinden Mustafa b. Mehmed nâm kimesne ile mürâfa‘a-i şer‘-i şerîf olduklarında târih-i i‘lâmdan dört ay mukaddem mezbûr Mustafa’ya yirmi sekiz guruşa bir re’s kır bargiri bey‘ ü teslîm ol dahi yedimden iştirâ ve kabz etmekle semeni olan meblağ-ı merkūm yirmi sekiz guruşu taleb ederim deyü ba‘de’d-da‘vâ ve’l-ikrâr mûcebince meblağ-ı merkūm yirmi sekiz guruşu müdde‘î-i mezbûra edâ ve teslîme mezbûr Mustafa’ya tenbîh eylediğini mevlânâ-yı mezbûr mahâllinde tahrîr ba‘dehû ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve ihbâr etmeğin bi’l-iltimâs huzûr-ı âlîlerine i‘lâm olundu. Fî 4 Ramazan sene 1154