Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 352 Hüküm no: 353 Orijinal metin no: [79b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye bt. Abdullah ile eşi Mustafa Çelebi’nin muhala‘a yoluyla boşandıkları Mahmiye-i İstanbul’da Mi‘mâr Ayaz Mahallesi sâkinelerinden olup zâtı Mehmed Çelebi b. Hasan ve İbrahim Çelebi b. Mustafa nâm kimesneler ta‘rîfleriyle mu‘arrefe olan Safiye bt. Abdullah nâm hatun meclis-i şer‘-i hatîr-i lâzımü’t-tevkīrde zevc-i dâhili işbu râfi‘u’l-kitâb Mustafa Çelebi b. Hasan nâm mahzarında ikrâr ve takrîr-i kelâm edip mezbûr Mustafa Çelebi zevcim olup beynimizde hüsn-i mu‘âşeretimiz olmamağla zimmetinde mütekarrir ve ma‘kūdun-aleyh olan bin iki yüz akçe mehr-i müeccelimin beş guruşunu bana def‘ ve teslîm ben dahi yedinden ba‘de’l-kabz bâkī altı yüz akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Mustafa Çelebi ile muhâla‘a-i sahîha-i şer‘iyye ile muhâla‘a olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyyete ve sâir beynimizde cereyân eden hukūk-ı ma‘lûme ve mechûleye müte‘allika âmme-i de‘âvî ve kâffe-i mütâlebâtdan her birimiz âharın zimmetini ibrâ-i âmm-ı râfi‘u’l-hısâm ile ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Mehmed Ağa b. Abdullah, İbrahim Çelebi b. Mustafa, İvaz Çelebi b. Abdullah, Kasım Çelebi b. el-Hâcı Hüseyin, Ahmed Çelebi b. Abdullah, Abdullah Çelebi b. Mustafa, İbrahim Çelebi b. Hasan, Mustafa Çelebi b. Mehmed.