Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 119 Hüküm no: 158 Orijinal metin no: [26b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Züleyha Hatun’un Abdi Beşe aleyhine açtığı tarla davasının zaman aşımı sebebiyle geçerli olmadığı Ma‘rûz; Yoros kazâsına tâbi‘ Muradlı karyesinde sâkine Zeliha bt. el-Hâc Mehmed nâm hatunun ber-vech-i âtî vekîl-i müsecceli Ali hasmı olup medîne-i Üsküdar’da sâkin Abdi Beşe b. Derviş Hasan nâm kimesneyi meclis-i şer‘a ihzâr ve mürâfa‘a-i şer‘ olduklarında mezbûr Abdi ile karındaşları Mehmed ve İsmail ve Mustafa karye-i mezbûre toprağında Yakacık ve Erike? nâm mahâlde babaları müteveffâ-yı mezbûr Der[viş] Hasan’dan sahib-i arz temessükü ile müntakil on bir sene bi-hakkın zabt ve öşr ve resmini sahib-i arza edâ edegeldikleri tahmînen iki yüz keyl tohum isti‘âb eden tarlalar mukaddemâ müvekkilem mezbûrenin babası mezbûr el-Hâc Mehmed’in tasarrufunda olup târih-i i‘lâmdan on sene mukaddem mezbûr el-Hâc Mehmed fevt oldukda müvekkilem mezbûreye intikāl etmekle bi’l-vekâle zabt murâdımdır deyü da‘vâ ettikde husûs-ı mezbûrda bi-hesâbi’l-kānûn-ı kadîm on sene mürûr eden tarla da‘vâsının istimâ‘ı memnû‘ olmağla vekîl-i mezbûr Ali merkūm Abdi ile bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 16 Ramazan sene 1154