Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 353 Hüküm no: 354 Orijinal metin no: [79b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife Hanım ile Sarrac el-Hacı Abdullah’ın muhala‘a yoluyla boşandıkları Husûs-ı âti’l-beyânın mahallinde istimâ‘ ve tahrîri için bi’l-iltimâs savb-ı şer‘-i kavîmden me’zûnen irsâl olunan başkâtibimiz Mevlânâ Mustafa Efendi b. el-merhûm Yunus Efendi mahmiye-i İstanbul’da Saraçhane kurbünde Mi‘mâr Ayas Mahallesi’nde sâkine fahrü’l-muha[dde]rât Hanife Hanım bt. el-merhûm Kara Hasanağazâde Mustafa Paşa’nın menziline varıp zeyl-i rakīmde muharrerü’l-esâmî Müslimîn mahzarlarında akd-i meclis-i şer‘-i şerîf ettikde zâtı mahalle-i mezbûre imâmı Osman Efendi b. Halil ve Müezzin Molla Mehmed b. Mustafa ta‘rîfleriyle mu‘arrefe olan mûmâ-ileyhâ Hanife Hanım meclis-i ma‘kūd-ı mezkûrda zevci bâ‘isü hâze’l-kitâb Sarrac el-Hâcı Mustafa [Abdullah] b. Halil mahzarında ikrâr ve takrîr-i kelâm edip merkūm el-Hâcı Abdullah bundan akdem zevcim olup beynimizde hüsn-i mu‘âşeretimiz olmamağla zimmetinde mütekarrir ve ma‘kūdun-aleyh altı bin akçe mehr-i müeccelim ve bedel-i hul‘ olmak üzere kendiye def‘ ve teslîm eylediğim seksen guruş ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr el-Hâcı Abdullah ile muhâla‘a-i sahîha-i şer‘iyye ile muhâla‘a eylediğimde ol dahi hul‘-ı mezbûru ba‘de’l-kabûl hukūk-ı zevciyyete ve kendiden iddi‘â eylediğim câriye semeni olan iki yüz guruşa ve akārâtımdan makbûzu olan icâre-i ma‘lûme ve târih-i kitâba gelince sâir beynimizde cereyân eden ahz u i‘tâya müte‘allika âmme-i de‘âvî-i mütâlebât ve muhâsamâtdan ben mezbûr el-Hâcı Abdullah’ı ibrâ-i âmm-ı kātı‘u’n-nizâ‘ ile ibrâ ve iskāt eylediğimde ol dahi ber-vech-i muharrer hukūk-ı zevciyyete ve benden müdde‘âsı olan iki yüz guruş ve târih-i kitâba gelince sâir beynimizde cereyân eden ahz u i‘tâya [80a] müte‘allika âmme-i de‘âvî ve mütâlebât ve muhâsamâtdan beni ibrâ-i âm ile ibrâ ve iskāt eyledi. Min-ba‘d birbirimiz ile kat‘â da‘vâ ve nizâ‘ımız yokdur dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ma‘an ba‘s olunan Çukadâr Ya‘kub Çelebi b. Mehmed ve Muhzır Abdullah b. Mustafa ile meclis-i şer‘a gelip her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’t-tâsi‘ min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Osman Efendi b. Halil Efendi el-imâm, Molla Mehmed b. Mustafa el-müezzin, el-Hâcı Abdullah b. Mehmed, Mehmed Çelebi b. Ahmed, Abdullah Çelebi b. Mustafa, el-Hâcı Ömer b. Mustafa, Molla Ali b. Mahmud, Osman b. Hüseyin, Yusuf Ağa b. Mustafa mumcu.