Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 127 Hüküm no: 174 Orijinal metin no: [29b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar’ın Gerede mahallesinde oturan ve uygunsuz hareketlerde bulunan Hatice ve kızının mahalleden gitmeyi kabul ettikleri Musahhah Üsküdar nâibi efendi mahallât defterine ne vechile kaydolunduğunu kefîli ile ma‘an ihrâc ve şer‘le görüp i‘lâm eyleyesiz [deyü buyruldu] Devletlü sa‘âdetlü sultânım hazretleri sağ olsun. Üsküdar’da Gerede mahallesinde sâkin ( ) nâm hatun birkaç kere mahalleden ihrâc ve Galata’ya râhı ve Galata’dan dahi sürülüp şimdi mahallemizde bir menzile girip nâ-şer‘ işlerde olup ehl-i ırz iyâllerimizi idlâle bâ‘is olmağla tahrîr-i şerîf başınız içün mezbûre avratlar Üsküdar kādısı huzûrunda mürâfa‘a ve keyfiyet-i ahvâl huzûra i‘lâm ve te‘addîleri ref‘ olunmak bâbında fermân. Bendegân Ahâlî-i mahalle. Ma‘rûz-ı dâ‘î-i devletleridir ki; Üsküdar’da Gerede mahallesinde Âişe Hatun’un menzilinde müste’cireler olan Hatice ve anası Fâtıma nâm avratlar dört ay mukaddem Kasımpaşa’dan gelip mahallât defterlerine kaydolunmayıp bilâ-kefîl olmalarıyla mahalle-i mezbûre İmâmı Osman Efendi ve ahâlî-i mahalleden el-Hâc Ahmed ve Osman ve Mehmed ve Veli ve diğer Osman ve Ali ve Mehmed Çelebi ve Ali Ağa ve Müezzin el-Hâc Abdullah nâm kimesnelerden her biri mezbûretân içün kendi hâllerinde olmayıp nâ-mahremden ictinâbları olmadıkları ecilden bir vechile emniyetimiz yokdur deyü mezbûre Hatice muvâcehesinde sû-i hâllerini ihbâr ve mahalleden ihrâclarını iltimâs ettiklerinden mezbûre Hatice dahi târih-i i‘lâmdan üç gün tamamında menzil-i mezbûru tahliye edip teslîm eylemek üzere meclis-i şer‘de ta‘ahhüd eylediği bi’l-iltimâs huzûr-ı âlîlerine i‘lâm olundu. Bâkī emr hazret-i men lehu’l-emrindir. Fî 18 Şevval sene 1154