Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 128 Hüküm no: 177 Orijinal metin no: [30a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Top arabacılarından Osman’ın Halil’deki alacağının tahsili Ma‘rûz; Üsküdar’da top arabacılarından Osman hasmı olup meclis-i şer‘a ihzâr eylediği Halil nâm kimesne ile ba‘de’t-terâfu‘ işbu hazır bi’l-meclis arabacı çorbacılarından es-Seyyid Süleyman’a mezbûr Halil’in cihet-i deyn-i şer‘îden altmış guruş deyni olmakla işbu târih-i i‘lâmdan senesi Ramazan-ı şerîfinde mezbûr Halil deyn-i merkūmunu mezbûr es-Seyyid Süleyman’a edâ ve teslîme bana emretmekle ben dahi emr-i merkūmesine binâ’en def‘ ü teslîm eylediğim meblağ-ı merkūm altmış altı guruşu mezbûr Halil’den taleb ederim deyü da‘vâ ettikde mezbûr Halil dahi cevâbında hâl müdde‘î-i mezbûrun takrîri üzere olup ve cihet-i mezkûreden bu vechile mezbûr Osman’a deyni olduğunu ikrâr lâkin târih-i i‘lâmdan yirmi gün mukaddem İstanbul’da arabacıbaşı menzilinde otuz üç buçuk guruşunu def‘ ü teslîm etmiş idim deyü ba‘de’d-def‘ ve’l-inkâr mezbûr Halil ber-vech-i muharrer def‘ini udûlden yine top arabacılarından Hüseyin b. Mehmed ve Mehmed b. Abdülkadir nâm kimesneler şehâdetleriyle isbât etmeğin mûcebince meblağ-ı bakī merkūm otuz iki buçuk guruş mezbûr Halil’den lâzım gelmekle müdde‘î-i mezbûr Osman’a edâ ve teslîme mezbûr Halil’e tenbîh olunduğu bi’l-iltimâs huzûr-ı âlîlerine i‘lâm olundu. Fî 29 Şevval sene 1154