Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 354 Hüküm no: 355 Orijinal metin no: [80a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Artin v. Lazar’ın Ergani madeni emini Selanikli Pir el-Hacı Mustafa Ağa’ya olan borcunu vekili Uzun Mehmed Ağa’ya ödediği Husûs-ı âti’l-beyânın mahallinde istimâ‘ ve tahrîri için bi’l-iltimâs savb-ı şer‘-i kavîmden me’zûnen irsâl olunan başkâtibimiz Mevlânâ Mustafa Efendi b. el-merhûm Yunus Efendi bi’l-fi‘il İstanbul ağası olup mahmiye-i İstanbul’da Sultan Mehmed Hân -tâbe serâhu- Câmi‘-i şerîfi kurbünde Taşçı Mustafabey Mahallesi’nde sâkin umdetü’l-emâcid ve’l-a‘yân Mustafa Ağa b. Abdülhâfız Ağa’nın menziline varıp zeyl-i sahîfede muharrerü’l-esâmî Müslimîn mahzarlarında akd-i meclis-i şer‘-i şerîf ettikde hâlâ medîne-i Diyârbekir kurbünde Ergani ma‘deni emîni umdetü’l-eşbâh Selanikî Pîr el-Hâcı Mustafa Ağa b. Ulûmî Şeyh Abdullah Efendi b. Abdurrahman’ın çukadârı ve tarafından ber-vech-i âtî vekâlet iddi‘â eden Uzun Mehmed Ağa b. Ahmed nâm kimesne meclis-i ma‘kūd-ı mezkûrda sarraf tâifesinden olup mahmiye-i mezbûrede Vâlidehanı’nda sâkin bâ‘isü hâze’s-sifr Artin v. Lazar nâm Ermeni muvâcehesinde üzerine da‘vâ ve takrîr-i kelâm edip emîn-i mûmâ-ileyh kendi mâlından on iki bin beş yüz guruş bundan akdem merkūm Sarraf Artin’e ikrâz ve teslîm ol dahi yedinden iktirâz ve tesellüm ve kabz ve istihlâk eyledikden sonra meblağ-ı mezbûrdan emîn-i mûmâ-ileyh dokuz yüz sekiz guruşunu bi-tarîk-i havâle umdetü’l-mevâliyyi’l-izâm Abdullah Efendi ve çukadârı birileriyle [yedleriyle] kabz ve istîfâ edip bâkī kalan on bir bin beş yüz doksan iki guruşu mezbûr sarrafdan taleb ve da‘vâ ve ahz u kabz ve kendiye îsâle tarafından beni vekîl ve nâib-i menâb nasb ve ta‘yîn eylediğinde ben dahi vekâlet-i mezbûreyi kabûl eylediğim ecilden hâlâ mezbûr Sarraf Artin’e suâl olunup meblağ-ı bâkī-i mezbûru bana edâ ve teslîme tenbîh olunması bi’l-vekâle matlûbumdur dedikde gıbbe’s-suâl mezbûr Sarraf Artin cevâbında fi’l-vâki‘ emîn-i mûmâ-ileyh Selanikî Pîr el-Hâcı Mustafa Ağa’ya meblağ-ı bâkī-i mezbûr on bir bin beş yüz doksan iki guruş ber-vech-i muharrer cihet-i karzdan elân zimmetinde edâsı lâzım deyni olduğunu ikrâr lâkin müdde‘î-i mezbûrun vech-i meşrûh üzere vekîl olduğu ma‘lûmum değildir deyü inkâr edicek müdde‘î-i mezbûrdan müdde‘âsına mübeyyine beyyine taleb olundukda udûl-i ahrâr-ı Müslimînden ve emîn-i mûmâ-ileyhin etbâ‘ından olup mahmiye-i mezbûrede Âşıkpaşa Mahallesi’nde sâkin Ali Bey b. Mehmed ve Mehmed Bey b. Mehmed nâm kimesneler li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka medîne-i Diyârbekir kurbünde hâlâ Ergani ma‘deni emîni olan Selanikî Pîr el-Hâcı Mustafa Ağa b. Ulûmî Şeyh Abd[ullah] Efendi b. Abdurrahman’ın merkūm Sarraf Artin zimmetinde cihet-i karzdan bâkī kalan on bir bin beş yüz doksan iki guruşu mesfûr Artin’den taleb ve da‘vâ ve ahz u kabz ve kendiye îsâle tarafından çukadârı işbu müdde‘î-i mezbûr Uzun Mehmed’i bizim huzûrumuzda vekîl ve nâib-i menâb nasb ve ta‘yîn eylediğinde ol dahi [80b] vekâlet-i mezbûreyi kabûl etmişidi müdde‘î-i mezbûr Uzun Mehmed emîn-i mûmâ-ileyhin ber-vech-i muharrer vekîlidir biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye ettikde gıbbe’t-ta‘dîl ve’t-tezkiye ş[eh]âdetleri makbûle olmağın mûcebiyle ba‘de’l-hükm ve’t-tenbîh vekîl-i mezbûr Uzun Mehmed meclis-i mezkûrda merkūm Sarraf Artin muvâcehesinde bi’l-vekâle ikrâr ve takrîr-i kelâm edip ânifen edâsına tenbîh olunan mablağ-ı bâkī-i mezbûr on bir bin beş yüz doksan iki guruşu mezbûr Sarraf Artin tamamen bana edâ ve teslîm ben dahi yedinden ber-vech-i muharrer bi’l-vekâle ahz u kabz eyledim ve mezbûr Sarraf Artin’in emîn-i müvekkil-i mûmâ-ileyh yedinde olan deyn-i mezkûr[u] nâtık temessükü âhar çukadârı yediyle îsâlinde esnâ-i tarîkde kuttâ‘i’t-tarîk eşkıyâsı yedlerinde zâyi‘ olmağın fîmâ-ba‘d zuhûr ederse lede’l-hükkâ[m]-ı kirâm mazmûnu ile amel ve istimâ‘ ve ısgā olunmasın dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde istimâ‘ [ve] tahrîr ve ma‘an irsâl olunan Çukadâr Mustafa b. Abdullah ve Muhzır Mustafa b. Ahmed ile meclis-i şer‘a gelip her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâmin min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Çavuşzâde Mustafa b. Mustafa, İstanbul ağası Mustafa Ağa b. Abdülhâfız, Hüseyin Ağa b. Mustafa, Ahmed Ağa b. Hüseyin, Mehmed Bey b. Ali.