Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 130 Hüküm no: 181 Orijinal metin no: [31a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yol kesip adam soyan ve manastır basıp rahibine eziyet eden eşkıyadan İbrahim b. Abdullah’ın cezâlandırılması için sevki Üsküdar’a muzâfe Adalar nâhiyesine tâbi‘ Tuzla karyesinde sâkin Romanos v. Dimitri nâm râhib derûn-ı arzuhâlde mezkûrü’l-ism İbrahim b. Abdullah’ı zindân hasekisi kulları mübâşeretiyle bâ-fermân-ı âlî Üsküdar’a ihzâr ve muvâcehesinde târih-i i‘lâmdan on iki gün mukaddem kable’l-işâda Kartal nâibi Süleyman Efendi dâ‘îlerinin arz ve i‘lâm edip esnâ-i ahzda mürd olan refîki Yorgi ve âhar refîki gāib ani’l-beled Tanaş nâm zimmîler ile karye-i mezbûre kurbünde olan manastırı basıp işbu mezbûr İbrahim benden altun talebi ile göğsüme ve ağzıma ateş koyup işbu mu‘âyene olunduğu vech üzere göğsümü ihrâk edip karye-i mezbûre etrâfında Kemikli Dede nâm mahâlde âlet-i harb ile gece hâlinde gezip ebnâ-i sebîlin önüne inip mâllarını nehb ü gāret ve katl-i nüfûs ve bu makūle fesâd ve şekāvet âdet-i müstemirresi olup ve’l-hâsıl mezbûr İbrahim’in vech-i arzdan izâlesi vâcib olmağla keyfiyet-i ahvâli vukūfu olan bî-garaz Müslimînden suâl olunup mûceb-i şer‘îsi icrâ olunmak matlûbumdur deyü da‘vâ ettikde mezbûr İbrahim husûs-ı mezbûru bi’l-külliye inkâr edip müdde‘î-i mezbûr râhib gece hâlinde ve mezbûr İbrahim içün manastıra varıp ber-vech-i muharrer altun talebi ile göğsüne ve ağzına ateş vaz‘ eylediğini beyândan âciz olmakla keyfiyet-i ahvâli Üsküdar’a tâbi‘ Kartal karyesi ahâlîsinden İbrahim Ağa b. Halil ve es-Seyyid Mustafa Ağa b. Mehmed ve zikrolunan Tuzla karyesi ahâlîsinden İmâm Mustafa Efendi b. Ahmed ve diğer İbrahim b. İsmail ve es-Seyyid Yusuf b. Abdullah ve diğer İbrahim b. Hüseyin nâm kimesnelerden her biri işbu şakī-i mezbûr İbrahim kendi hâlinde olmayıp gece hâlinde âlet-i harb ile Kemikli Dede ve ol havâlîde gezip ebnâ-i sebîlin yollarına inip nehb ü gāret ve kat‘-ı tarîk ve katl-i nüfûs âdet-i müstemirresi olup ve’l-hâsıl bu vechle “sâ‘îbi’l-fesâdi fi’l-arz ve vâcibü’l-izâledir” deyü alâ-tarîkı’ş-şehâde muvâcehesinde meclis-i şer‘de haber vermeleriyle mahbûs-ı mezbûrun şer‘an hakkında lâzım gelen cezâsı re’y-i veliyyü’l-emre müfevvez olmakla şakī-i mezbûr İbrahim Haseki merkūm kulları yediyle huzûr-ı âlîlerine irsâl olundu. Fî 4 Zilka‘deti’ş-şerîfe sene 1154