Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 132 Hüküm no: 186 Orijinal metin no: [32a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Abdullah’ın haksız yere eline geçirdiği Şamizâde Mehmed Efendi Vakfı’na bağlı menzile aid atik temessükün iptali Ma‘rûz; Sahibe-i arzuhâl Okumuş demekle ma‘rûfe Fâtıma bt. Abdullah merhûm Şâmîzâde Mehmed Efendi Vakfı’ndan Üsküdar’da Salacak mahallesinde bir bâb vakıf menzile bi’l-icâreteyn mutasarrıf olan Şehrî Mehmed Efendi tarafından vekîl-i şer‘îsi Hasan ile vakf-ı mezbûrun meşrûtiyyet üzere mütevellîsi Rukiye tarafından vekîli olan câbî-i vakf diğer Hasan hazır olduğu hâlde dîvân-ı âlîlerinde ma‘kūd meclis-i şer‘de mürâfa‘a ve Üsküdar’a havâle olunup hakīkat-i hal menzil-i mezbûra mutasarrıf müvekkil-i mezbûrun yedinde olan sâbıkā Üsküdar kādısı Pîrî Mehmed Efendi mührüyle memhûr bin yüz kırk yedi târihîyle müverrah i‘lâm-ı şer‘î ve yine sene-i mezbûre târihiyle müverrah merhûm Mehmed Râşid Efendi [32b] mührüyle memhûr i‘lâm-ı şer‘î ve yine sene-i mezbûrede İstanbul kādısı Mehmed Efendi dâ‘îleri mührüyle memhûr i‘lâm-ı şer‘îleri mûceblerince mezbûre Okumuş Fâtıma menzil-i merkūme vâlidem Fâtıma bt. Abdullah’dan müntakil olup bilâ-veled fevt oldu deyü zikrolunan târihler ile müverrah i‘lâmlarda tafsîl olunduğu vech üzere müdde‘âsını beyâna kādire olmayıp mu‘ârazadan men‘ ve menzil-i mezbûr tahliye ve teslîm olunup târih-i mezkûrlardan bu âna gelince menzil-i mezkûra müdâhalesi yok iken bu def‘a mezbûre Okumuş Fâtıma mütevelliye-i mezbûrenin bilâ-veled fevt oldu deyü mahlûlünden menzil-i mezkûru âhara tefvîz eylediği işbu yedinde olan atîk temessükde ismi tahrîr olunan Fâtıma bt. Abdullah benim ve benim fevtim gayr-ı vâki‘dir deyü eylediği da‘vâsı mezbûre ve müdde‘iye-i mezbûre Okumuş Fâtıma bt. Abdullah an-asıl menzil-i mezkûra mutasarrife olmayıp bilâ-veled fevt olan diğer Fâtıma’nın hizmetinde olmak takrîbiyle atîk temessük yedinde kaldığına binâ’en işbu müdde‘iye-i mezbûre hizmetinde olduğu mahalle-i mezbûre imâmı ve cemâ‘atinden müseccelü’l-esâmî kimesneler müdde‘iye-i mezbûre muvâcehesinde şehâdet, da‘vâ-yı tezvîr ile nev-be-nev menzil-i mezbûra mutasarrıf olanları ve mütevellî-i vakfı ta‘cîzden hâlî olmamağla müdde‘iye-i mezbûrenin kat‘â alâka ve medhali olmadığı şer‘an sâbit olup ancak yedinde olan atîk temessük bu âna değin şak olunmadığından ta‘cîzden hâlî değildir ma‘lûm-ı şerîfleri buyruldukda bâb-ı tezvîrâtı münsed içün yedinde olan atîk temessük şak olmağla [olmağa] muhtâcdır. Fermân men lehu’l-emrindir. Fî 14 Zilka‘de sene 1154