Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 355 Hüküm no: 356 Orijinal metin no: [80b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Müslime Hatun’un techîz ve tenfîzine eşi Mehmed Çelebi’yi vasi tayin ettiği Mahmiye-i İstanbul’da Muradpaşa-yı cedîd Mahallesi sâkinelerinden Şerife Müslime bt. Hüseyin Efendi b. Abdullah nâm hatun tarafından husûs-ı âti’z-zikri ikrâra vekîl olduğu zâtını ârifân es-Seyyid Mustafa Efendi b. es-Seyyid Mehmed Efendi ve Molla Mehmed b. Ömer nâm kimesne meclis-i şer‘-i hatîr-i lâzımü’t-tevkīrde müvekkilem mezbûrenin zevci ber-vech-i âtî vasiyy-i muhtârı işbu râfi‘u’l-kitâb Mehmed Çelebi b. Hasan nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Şerife Müslime Hatun müsinne olmağla bi-emri’llâhi te‘âlâ vefât eylediğinde cemî‘ terekesini mezbûr Mehmed Çelebi bi’l-vesâye ahz u kabz eylediğinden sonra terekesinin sülüsünü ifrâz ve sülüs-i mezkûrdan üç bin akçesini iskāt-ı salâtı için vech-i şer‘î üzere fukarâya devrede ve sülüs-i mezbûrdan on guruş hediyeli üç Mushaf-ı şerîf iştirâ edip her birini talebe-i ulûmdan birer müstahik kimesneye vere ve üç bin akçe ile eyyâm-ı mu‘tâdede tabh-ı ta‘âm ve it‘âm-ı fukarâ ede ve mezkûrdan her ne bâkī kalırsa mezbûr Mehmed Çelebi di[le]diği vücûh-ı birre harc ve sarf ede ve mâ‘adâ sülüsân terekesinden mezbûr Mehmed Çelebi nısf hisse-i irsiyyesini bi’l-verâse ahz u kabz eylediğinden sonra bâkīsini kız karındaşı oğulları ve hasren vârisleri olup medîne-i Üsküdar’da sâkin Ahmed Çelebi ve Mehmed Çelebi nâm kimesnelere îsâl ede ve bu vasiyyet ve tenfîzine mezbûr Mehmed Çelebi’yi vasiyy-i muhtâr nasb ve ta‘yîn eyledi dedikde ol dahi vesâyet-i mezbûreyi kabûl ve hizmet-i lâzımesin edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’l-hâmis min-şehri Şa‘bâni’l-mu‘azzam sene 1143. Şuhûdü’l-hâl: Mehmed Çelebi b. İsmail, Ahmed Çelebi b. Mehmed el-müezzin-i mahalle-i mezbûr, Derviş Abdullah, İbrahim Çelebi b. Mustafa.