Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 136 Hüküm no: 193 Orijinal metin no: [33b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahudi Sabatay’ın vefat eden İbrahim Ağa’daki alacağının kefaletinden dolayı oğlu Osman’dan tahsili Ma‘rûz; Sahib-i arzuhâl Sabatay Yahûdî hasmı olup derûn-ı arzuhâlde mezkûrü’l-ism Osman b. İbrahim Ağa nâm kimesne ile dîvân-ı âlîlerinde ma‘kūd meclis-i şer‘de ba‘de’t-terâfu‘ mezbûr Osman’ın babası müteveffâ İbrahim Ağa b. Abdullah bin Abdurrahman bin yüz elli iki senesi Cumâdelâhıre’si târihiyle müverrah işbu yedimde olan deyn temessükü mantûkunca yedimden istikrâz ve kabz ve kendi mesârifine sarfla istihlâk eylediği üç bin beş yüz yetmiş beş guruş hakkımı mezbûr İbrahim Ağa bana kable’l-edâ fevt olup hâlâ zimmetinde bâkī olmağla meblağ-ı mârrü’z-zikr üç bin beş yüz yetmiş beş guruş hakkıma yine târih-i mezbûrda temessükde tasrîh olunduğu vech üzere oğlu işbu Osman emr ve kabûlü hâviye kefâlet-i sahîha-i şer‘iyye ile kefîl ve dâmin olmağın bi-hükmi’l-kefâle mezbûr Osman’dan taleb ederim deyü da‘vâ ettikde mezbûr Osman cevâbında meblağ-ı merkūma ber-vech-i muharrer kefîl ve dâmin olduğum hâlde sabî olup ol vechile kefâletim sahîha olmadığından mâ‘adâ bir sene mürûrunda Sabatay babam müteveffâ-yı mezbûrdan meblağ-ı mezbûru taleb ettikde oğlum Osman dahi kefîldir dedikde mersûm [34a] Sabatay sabî kefâleti sahîh değildir deyü beni kefâletten azl edip berî olmuş idim deyü def‘le cevâb edip lâkin def‘-i zâhir kizb olup mezbûr Osman’ın sakal ve traş ve bıyıklı olup bir buçuk sene mukaddem sabî olduğunu tekzîb olunmağla müdde‘î-i mesfûrdan da‘vâsına mutâbık beyyine taleb olundukda medîne-i Üsküdar’da Mehmed Paşa mahallesi ahâlîsinden Mustafa Ağa b. İsmail ve el-Hâc Mehmed b. Ömer ve el-Hâc Hüseyin b. Şaban ve Ali b. Yusuf nâm kimesnelerden her biri mezbûr Osman muvâcehesinde iki buçuk sene mukaddem babam müteveffâ İbrahim Ağa’nın işbu Sabatay Yahûdî’ye olan üç bin beş yüz yetmiş beş guruş deynine emr ve kabûlü hâviye kefâlet-i sahîha-i şer‘iyye ile kefîl ve dâmin olduğu hînde âkıl ve bâliğ ve reşîd-i tâm idi. Müdde‘î-i mersûm içün cihet-i kefâletten meblağ-ı mezbûru hak ve taleb ve ahzı vardır biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince meblağ-ı merkūm üç bin beş yüz yetmiş beş guruş bi-hükmi’l-kefâle edâ ve teslîme mezbûr Osman’a tenbîh olunup mübâşiri Mustafa Çavuş kulları iltimâsıyla huzûr-ı âlîlerine i‘lâm olundu. Fî 18 Zilka‘de sene 1154