Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 138 Hüküm no: 198 Orijinal metin no: [34b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pavne bt. Ligori’den kalan tereke hususunda vârislerin anlaştığı Ma‘rûz, Derûn-ı arzuhâlde mezkûrü’l-ism hâlike olan Pavne bt. Ligori nâm Nasrâniyenin verâseti Fotini ile sadriye kebîre kızı Zoli nâm Nasrâniyeye munhasıra olduğu şer‘an tahakkukdan sonra zâtı ta‘rîf-i şer‘î ile mu‘arrefe olan anası mezbûre Fotini terekeye vaz‘-ı yed eden kızı mezbûre Zoli ber-mûceb-i fermân-ı âlî dîvân-ı âlîlerinde ba‘de’t-terâfu‘ Üsküdar’a havâle olundukdan sonra [35a] anası mezbûre Fotini Nasrâniye ber-mûceb-i defter-i kassâm kızı hâlike-i mezbûrenin terekesinden yüz guruş hisse-i irsiyesinden kırk guruşunu mukaddemâ ahz ü istifâ eylediği yedinde olan hüccet nâtık olduğu üzere mütebeyyin ve bâkī altmış guruşun yirmi guruşunu nakid meclis-i şer‘de ba‘de’l-kabz bâkī kırk guruşu kızının kızı mezbûre Zoli Nasrâniyeye hîbe ve temlîk ol dahi ittihâb ve kabûl edip hâlike-i mezbûrenin dâhil-i defter ve hâric-i ez-defter kalîl ü kesîr cemî‘ terekesine ve Üsküdar’da Yeni mahallede vâki‘ ma‘lûmü’l-hudûd mülk menzillerine ve târih-i i‘lâma gelince beynlerinde cereyân eden ahz [u] i‘tâya ve gayra müte‘allika âmme-i de‘âvî ve mütâlebâtdan gerek mezbûre Zoli’nin ve gerek zevci hazır bi’l-meclis Yanaki zimmînin zimmetlerini ibrâ ve ıskāt eyledikleri rızâlarıyla Üsküdar’da tescîl-i şer‘î olunup vâki‘ hâl mübâşir Osman Çavuş kulları iltimâsıyla huzûr-ı âlîlerine i‘lâm olundu. Fî 22 Zilkâ‘de sene 1154