Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 139 Hüküm no: 199 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da Keresteci Yasef’in alacağının Çengelköy’de ikamet eden Maryore bt. Yorgi’den tahsil edilmesi Ma‘rûz, İstanbul’da Keresteci Yasef hasmı Üsküdar’a tâbi‘ Çenger karyesinde sâkine zâtı vech-i şer‘î üzere mu‘arrefe olan Maryore bt. Yorgi nâm Nasrâniye muvâcehesinde yedinde olan temessük mantûkunca cihet-i deyn-i şer‘îden dört yüz seksen guruş mezbûre Maryore ile dâmadı gāib ani’l-meclis Bakkal Yorgi nâm zimmîden ber-vech-i iştirâk hakkımın elli guruşunu mezbûrân yedlerinden mukaddemâ ahz u kabz edip bâkī dört yüz otuz guruş hakkım kalmağla meblağ-ı bâkī-i mezbûr dört yüz otuz guruşdan herbiri âharın zimmetine lâzım gelen meblağa emr [ve] kabûlü hâviye vekâlet-i sahîha-i şer‘iyye ile kefîl ve zâmin olmalarıyla meblağ-ı bâkī-i mezbûr dört yüz otuz guruş hakkımı bi’l-asâle ve bi’l-kefâle mezbûre Maryore’den taleb ederim deyü da‘vâ ettikte mezbûre Maryore cevâbında meblağ-ı bâkī-i mezbûr dört yüz otuz guruşu bi’l-asâle ve bi’l-vekâle deynimdir deyü bi-tav‘ihâ ikrâr u i‘tirâf etmeğin mûcebince meblağ-ı mezkûr dört yüz otuz guruşu asâlet ve kefâletine binâen müdde‘î-i mezbûra edâ ve teslîme mezbûre Maryore Nasrâniyeye tenbîh olunduğu Üsküdar’da ba‘de’t-tescîl huzûr-ı âlîlerine i‘lâm olundu bâkī fermân men lehu’l-emrindir. Fî-gurreti-Zilhicce sene 1154