Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 147 Hüküm no: 219 Orijinal metin no: [38a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rado’ya nizama aykırı olarak evde mum dökülmemesi hususunda tenbihte bulunulması Ma‘rûz, Üsküdar’da mumcu ustalarından Esteryo ve Aleksandır nâm zimmîler meclis-i şer‘a gelip ifâde-i merâm edip Üsküdar’da olan mumhâneden gayrı mahâlde mum dökülmek hilâf-ı nizâm iken san‘at-ı merkūmeden mukaddemâ hacr olunan Rado nâm zimmî Üsküdar’da Kefere mahallesinde sâkin olduğu menzil derûnunda vezninde noksan mum döküp hufyeten bey‘ ile nizâmımıza halel ve bu vechile Üsküdar’da vezninde noksan mum bey‘ olunur deyü mesmû‘-ı Devlet-i Aliyye oldukta mu‘âteb olmak havfımız olduğu ecilden zimmî-i mesfûr ihzâr-ı şer‘ olunup kıbel-i şer‘den tenbîh ve vâki‘ hâl i‘lâm olunmak matlûbumdur dediklerinde taraf-ı şer‘den çukadâr bendeleri irsâl ve derûn-ı menzili ba‘de’t-tecessüs zimmî-i mesfûr ihzâr-ı şer‘ olunup hufyeten derûn-ı menzilde mum işlemeyip ve nizâm-ı kadîme mugāyir hareket etmemek üzere merkūm Rado zimmîye kıbel-i şer‘den tenbîh olunduğu bi’l-iltimâs huzûr-ı âlîlerine i‘lâm olundu, bâkī emr [u] fermân men lehu’l-emrindir. Fî 21 Zilhicce sene 1154