Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 147 Hüküm no: 220 Orijinal metin no: [38a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar Yeni mahalledeki mülk menzili değerinin üstünde satıldığının tespiti üzerine satışın iptali ve meblağın geri ödenmesi Ma‘rûz, Sahib-i arzuhâl Agob zimmî hasmı Saltana bt. Devlet v. Kivorg nâm Nasrâniyenin zevci ve tarafından vekîl-i sâbitü’l-vekâlesi Artin muvâcehesinde Üsküdar’da Yeni mahallede vâki‘ bir taraftan Avadik ve bir taraftan Karabet ve bir taraftan Panos mülkleri ve bir taraftan tarîk-i âm ile mahdûd iki bâb fevkānî oda ve bir sofa ve bir matbah ve tahtında bir oda ve bir mahzen ve kenîf ve tûlen ve arzen bi-hesâb-ı terbî‘i sekiz zirâ‘ arsa ve bir mikdâr bağçeyi müştemil mülk menzilini târih-i i‘lâm senesi şehr-i Recebi’l-ferdin yedinci günü bana bey‘ eder oldukta menzil-i merkūm makbûl yerdedir deyü dahi beni tağrîr etmekle ben dahi beş yüz bir guruşa iştirâ edip lâkin beş yüz bir guruş değer deyü menzil-i mezkûrun semen-i misli iki yüz elli guruş olup bey‘-i merkūm tağrîr ve gabn-i fâhiş ile olmağla menzil-i merkūmu kabz ve makbûzu olan semen-i merkūmu geri red ve teslîme tenbîh olunmak matlûbumdur deyü da‘vâ ettikte vekîl-i mezbûr cevâbında menzil-i mezkûru beş yüz bir guruş semen-i makbûza zevcesi müvekkile-i mezbûre müdde‘î-i mezbûra bey‘ eylediğini ikrâr lâkin tağrîr ve gabn bi’l-külliye inkâr etmekle müdde‘î-i mezbûr evvelâ tağrîri lede’t-tezkiye adâletleri zâhir Hâfız İbrahim Efendi b. el-Hâc Ahmed nâm kimesne ile Artin v. Avanis ve Serkiz v. Azarya ve Kiragos v. Serkiz nâm zimmîler şehâdetleriyle vech-i şer‘î üzere isbât ettikten sonra kıbel-i şer‘den menzil-i merkūm mu‘âyene olundukta harâb olup bir vechile kābil-i süknâ olmamağla semen-i misli iki yüz elli guruş olduğu vukūf-ı tâmmı olan Tüccâr Haçor ve Kirkor ve Toros ve diğer Kirkor ve Karabet ve Bali nâm zimmîler ihbârlarıyla lede’ş-şer‘i’l-enver zâhir ve bey‘-i merkūm ber-vech-i muharrer tağrîr ve gabn-i fâhiş ile olduğu şer‘an sâbit olmağın menzil-i merkūmu kabz ve makbûzu olan semen-i mezkûru geri red ve teslîme vekîl-i mezbûra tenbîh olunduğu bi’l-iltimâs huzûr-ı âlîlerine i‘lâm olundu. Fî 23 Zilhicce sene 1154