Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 359 Hüküm no: 362 Orijinal metin no: [81b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostantin v. Bakim’in tasarrufunu iddia ettiği Kamer Hatun Vakfı’na ait evin mûrisi Praşkeva tarafından vakıf için yangından sonra yeniden bina edildiği Bâ-imzâ-i hazret-i efendi. Mahmiye-i İstanbul’da Şeyh Ferhad Mahallesi’nde vâki‘ Kamer Hatun Vakfı’ndan bir tarafdan Çoban Çavuş Süleyman Ağa Vakfı bir tarafdan Bargam zimmî mülkü ve iki tarafdan tarîk-i âm ile mahdûd bir bâb menzile bi’l-icâreteyn mutasarrıf olan Praşkeva zimmînin zî-rahm cihetinden hasren vârisi olan Kostantin v. Bakim nâm zimmî meclis-i şer‘-i şerîf-i enverde vakf-ı mezbû[r] mütevellîsi olmağla menzil-i mahdûd-ı mezbûra bi’t-tevliye vaz‘-ı yedi müte‘ayyin olan râfi‘u’l-vesîka İmâm Ali Efendi b. Abdullah Efendi mahzarında üzerine da‘vâ ve takrîr-i kelâm edip menzil-i mahdûd-ı mezbûr mûrisim hâlik-i mezbûrun bi’l-icâreteyn tasarrufunda iken bin yüz yirmi yedi senesinde vâki‘ harîkde bi’l-külliye muhterik olup eser-i binâdan nesne kalmamağla mûrisim hâlik-i mezbûr hayâtında üzerine mâlıyla mülkü olmak üzere binâ eyledikden sonra hâlik olmağla ebniyesi irsen bana intikāl eylemişiken mütevellî-i mezbûr menzil-i mahdûd-ı mezbûru bi-gayr-ı vech-i şer‘î zabt eder suâl olunsun dedikde gıbbe’s-suâl mütevellî-i mezbûr İmâm Ali Efendi cevâbında fi’l-vâki‘ menzil-i mahdûd vakf-ı mezbûrdan müdde‘î-i mezbûrun mûrisi hâlik-i merkūm Praşkeva zimmînin hayâtında tasarrufunda olmağın ba‘de’l-helâkihî evlâdı kalmamağla taraf-ı vakfa âid olmak üzere bi’t-tevliye zabt ve tasarrufunu ikrâr lâkin hâlik-i mezbûr menzil-i mahdûd-ı mezbûr bin yüz yirmi yedi senesinde vâki‘ harîkde bi’l-külliye muhterik oldukda merkūm Praşkeva üzerine eylediği binâsını vakıf için binâ ve işhâd dahi eylemişidi deyü def‘le mukābele edicek gıbbe’l-istintak ve’l-inkâr mütevellî-i mezbûr İmâm Ali Efendi’den def‘-i mazbûrunu mübeyyine beyyine taleb olundukda udûl-i ahrâr-ı ricâl-i Müslimînden ve mahalle-i mezbûre ahâlîsinden Ya‘kub [82a] b. Mehmed ve el-Hâc Mehmed b. Mahmud ve Molla Mehmed b. el-Hâc İbrahim ve Miskçi İbrahim Çelebi b. Abdullah ve es-Seyyid Osman Çelebi b. es-Seyyid Mehmed ve Mustafa Bey b. Abdullah ve Ahmed Beşe b. el-Hâc Abdi ve Mehmed Çelebi b. Abdüsselam ve Hâfız es-Seyyid Mahmud Efendi b. İbrahim ve el-Hâc Mehmed b. Mustafa ve Mustafa b. Himmet ve el-Hâc Ali b. Ali ve Hancızâde Mustafa Ağa ve Hamamcı Mustafa Bey b. Yusuf nâm kimesneler li-ecli’ş-şehâde meclis-i şer‘a hâzirûn olup istişhâd olunduklarında fi’l-vâki‘ müdde‘î-i mezbûrun zî-rahm cihetinden hasren vârisi olup Mahmiye-i mezbûrede Şeyh Ferhad Mahallesi’nde vâki‘ Kamer Hatun Vakfı müsakkafâtından bir tarafdan Çoban Çavuş Süleyman Ağa Vakfı ve bir tarafdan Bargam zimmî mülkü ve tarafeyni tarîk-i âm ile mahdûd vakıf menzile bi’l-icâreteyn mutasarrıf olan Praşkeva zimmî bin yüz yirmi yedi senesinde vâki‘ harîkde menzil-i mahdûd-ı mezbûr muhterik oldukda mezbûr Praşkeva zimmî menzil-i mahdûd-ı mezbûru mâlıyla vakıf için binâ ve bizi işhâd etmişidi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm müdde‘î-i mesfûr Kostantin zimmî bî-vech mu‘ârazadan men‘-birle mâ-vaka‘a bi’t-taleb ketb olundu. Fi’l-yevmi’l-âşir min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Mehmed Çelebi b. Mehmed kethüdâ, Salih Çelebi b. Süleyman, el-Hâc Âmir?, Şukûfeci el-Hâc Mehmed b. Mahmud, Mehmed b. el-Hâc İbrahim.